MA JUNTAQʼEET nekeʼilok ebʼ li chʼinaʼal li wankebʼ saʼ li eetalil? Jalan nekeʼilok. Anihebʼ xkʼabʼaʼ? Laj chapol xul aʼan aj Esau ut laj kʼaakʼalenel karneer aʼan aj Jacob.

Laj Esau ut laj Jacob lutebʼ ut aʼanebʼ xkokʼal laj Isaac ut xRebeca. Laj Esau raaro xbʼaan li xyuwaʼ xbʼaan naq naxkʼam li tzakahemq saʼ rochoch. Abʼan, li xRebeca naxra laj Jacob xbʼaan naq chaabʼil ut tuulan xchʼool.

Laj Jacob kiwulak tana chiru rabʼinkil laj Abrahan, li xyuwaʼchin, naq naʼaatinak chirix li Jehobʼa! Laj Abrahan kikamk naq wank 175 chihabʼ re ut 15 chihabʼ wankebʼ re li lut.

Laj Esau wank 40 chihabʼ re naq kisumlaak rikʼinebʼ wiibʼ li ixq aj Canaan. Kʼajoʼ naq keʼrahoʼk saʼ xchʼool laj Isaac ut xRebeca, xbʼaan naq ebʼ li ixq aʼin, inkʼaʼ nekeʼxloqʼoni li Jehobʼa.

Saʼ jun kutan, laj Esau kijosqʼoʼk rikʼin laj Jacob. Ma nakaanaw kʼaʼut? Kiwulak xqʼehil naq laj Isaac trosobʼtesi li xbʼeen ralal. Laj Esau asbʼej chiru laj Jacob joʼkan naq laj Esau kixkʼoxla naq aʼan t-osobʼtesiiq. Abʼan laj Esau ak xkʼayi li rosobʼtesihom re laj Jacob. Naq keʼyoʼlaak ebʼ li lut aʼin, li Yos ak kixye naq laj Jacob tixkʼul li osobʼtesiik aʼin. Joʼkan naq laj Isaac kirosobʼtesi laj Jacob.

Naq laj Esau kixnaw aʼin, kʼajoʼ naq kichalk xjosqʼil rikʼin laj Jacob, joʼkan naq kixye naq tixkamsi. Naq li xRebeca kirabʼi li tixbʼaanu laj Esau, kʼajoʼ naq kixuwak. Joʼkan naq kixye re laj Isaac, li xbʼeelom: ‹Moko tinkuy ta rilbʼal naq laj Jacob tsumlaaq rikʼin junaq li ixq aj Canaan›.

Chirix chik aʼan, laj Isaac kixbʼoq laj Jacob ut kixye re: ‹Matsumla rikʼin junaq ixq aj Canaan. Ayu saʼ li tenamit Haran saʼ rochoch laayuwaʼchin, Betuel. Ut sumlan rikʼin junaq rehebʼ li xrabʼin laj Laban›.

Laj Jacob kixpaabʼ i xyuwaʼ ut xko saʼ li tenamit Haran.