ABANO bakalombwana bapusana bingi, ke ibyo nenyi? Nanchi wibayuka mazhina abo nyi? Kibinda wajinga Isao, ne kalombwana wafungilenga mikooko ke Yakoba.

Isao ne Yakoba bajinga mapasa a ba Izaka ne Libeka. Izaka wamutemenwe bingi mwananji Isao mambo a kuba wajinga kibinda kabiji waletanga manyi a kubelela pa nzubo. Bino Libeka watemenweko Yakoba mambo wajinga kimote kabiji wa mutende.

Nkambo ya bano baana aye Abalahama wakijinga mumi, kabiji twakonsha kufwanyikizha Yakoba byo aumvwinenga bulongo kuteleka ku misambo ya pa mambo a Yehoba. Kyapeleleko, Abalahama wafwile saka aji na myaka ya kusemwa 175, bino mapasa saka aji na myaka ya kusemwa 15.

Kimye Isao kyo afikizhe myaka ya kusemwa 40 wasongwele banabakazhi babiji ba mu kyalo kya Kenana. Kino kyafichishe bingi Izaka ne Libeka ku muchima mambo bano banabakazhi kechi bapopwelanga Yehoba ne.

Juba jimo kintu kimo kyamwekele kyalengejile Isao kuzhingijila nkasanji aye Yakoba. Kimye kyafikile Izaka kyo afwanyijile kupesha mwananji mubeji. Pakuba Isao ye wajinga mukulumpe pe Yakoba, ye wafwanyijilwe kutambula ano mapesho. Bino Isao patanshitu wapoteshe kwi Yakoba jishuko ja kutambula mapesho. Kabiji bano baana saka bakyangye kusemwa, Lesa waambijile jimo kuba’mba Yakoba ye ukatambula mapesho. Ne kino byo byo kyamwekele. Izaka wapesheshe mwananji aye Yakoba.

Isao byo ayukile kino wamubukijile bukaji Yakoba. Wazhingijile bingi kya kuba kalanguluke ne kumwipaya Yakoba. Libeka byo aumvwine kino, waubile kijikila. Kepo abujile mwata wanji Izaka amba: ‘Kikatama bingi umvwe Yakoba naye wasongola mwanamukazhi wa mu bena Kenana.’

Ponkapo Izaka waichile Yakoba mwananji ne kumwambila’mba: ‘Kechi usongole mwanamukazhi wa mu bena Kenana ne. Imana uyenga ku nzubo ya nkambo yobe Betwela ku Halana. Ko ko ukasongola umo wa mu baana ba bamwisho wobe ba Labanyi.’

Yakoba waumvwijile ba shanji kabiji ponkapotu waendele lwendo lwalepa bingi ne kuya ku balongo banji ku Halana.