ပူ ၁၇
ဒီပုၢ်ဝဲၢ်သဃံာ်ခံဂၤလၢ တၢ်ပာ်သူၣ်ပာ်သးတဒ်သိးလိာ်အသး အဂ့ၢ်
ပိာ်ခွါဖိသၣ်ခံဂၤလၢ တၢ်ဂီၤပူၤအံၤ အတၢ်ပာ်သူၣ်ပာ်သး လီၤဆီလိာ်အသးဒိၣ်မးန့ၣ်လီၤ တမ့ၢ်ဘၣ်ဧါ. သုသ့ၣ်ညါအဝဲသ့ၣ်အမံၤဧါ. ပှၤခးတၢ်မံၤလးဖိန့ၣ် အမံၤမ့ၢ် ဧ့ၡီၤလီၤ. မ့မ့ၢ်ဖိသၣ်လၢအကွၢ်သိတခီ အမံၤမ့ၢ် ယၤကိာ်လီၤ.
ဧ့ၡီၤဒီးယၤကိာ်န့ၣ်မ့ၢ်ဝဲ အံၤစဲးဒီးရံးဘကၤအဖိသဃံာ်ခံဂၤန့ၣ်လီၤ. မ့မ့ၢ်အပၢ်အံၤစဲးန့ၣ် အဲၣ်အဖိဧ့ၡီၤဒိၣ်မးလီၤ. ဘၣ်မနုၤအဃိလဲၣ်န့ၣ် ဧ့ၡီၤတခီ ခးတၢ်မံၤလးဖိသ့အဃိ ဟဲက့ၤစိာ်ဝဲတၢ်မံၤလးဖိ လၢဟံၣ်ဖိဃီဖိကအီၣ်အဂီၢ် အဃိန့ၣ်လီၤ. မ့မ့ၢ်ရံးဘကၤတခီ အဲၣ်ဒိၣ်ဝဲယၤကိာ်လီၤ. ယၤကိာ်မ့ၢ်ပှၤအခုၣ် ဒီးပှၤအိၣ်ဃူအိၣ်ဖိးတၢ်သ့အဃိန့ၣ်လီၤ.
အဝဲသ့ၣ်အဖုဖု အၤဘြၤဟၣ်န့ၣ် အိၣ်မူဒံးဝဲန့ၣ်လီၤ. ယၤကိာ်န့ၣ် ဖဲအဖုဖုအၤဘြၤဟၣ်တဲဘၣ်အီၤ ယဟိဝၤအဂ့ၢ်အခါ ကဘၣ်သူၣ်ဘၣ်သးဝဲ ဒီးကဒိကနၣ်ဝဲ ဆံးဒိၣ်လဲၣ်န့ၣ် ပဆိကမိၣ်ကွၢ်သ့လီၤ. အၤဘြၤဟၣ်သံ ဖဲအသးအိၣ် ၁၇၅ နံၣ်န့ၣ်လီၤ. ဖဲဆၢကတီၢ်အဝဲန့ၣ် ပှၤဒီပုၢ်ဝဲၢ်သဃံာ်ခံဂၤအံၤ အသးအိၣ် ၁၅ နံၣ်လံန့ၣ်လီၤ.
ဖဲဧ့ၡီၤအသးအိၣ် ၄၀ အခါ ဟံးန့ၢ်ဝဲပှၤကနၤဧၣ်မုၣ်ခံဂၤလီၤ. လၢတၢ်အံၤအဃိ အံၤစဲးဒီးရံးဘကၤ အသးဘၣ်ဖှီၣ်ဝဲသ့ၣ်ဒိၣ်မးန့ၣ်လီၤ. ပိာ်မုၣ်တဖၣ်အံၤ တဘူၣ်ထီၣ်ဘါထီၣ်ဝဲသ့ၣ် ယဟိဝၤအဃိန့ၣ်လီၤ.
ဘၣ်မုၢ်တနံၤန့ၣ် တၢ်ဂ့ၢ်ဟဲကဲထီၣ်တခါလၢ ဧ့ၡီၤကသးထီၣ်အပုၢ်နးနးကလဲာ်အဂီၢ်န့ၣ်လီၤ. အဆၢကတီၢ်ဟဲတုၤလၢ အံၤစဲးကဆိၣ်ဂ့ၤအဖိဝဲၢ်ကိလီၤ. ဧ့ၡီၤန့ၣ် မ့ၢ်လၢအဒိၣ်န့ၢ်ယၤကိာ်အဃိ မုၢ်လၢ်ဝဲတၢ်ဆိၣ်ဂ့ၤအံၤလီၤသၢၣ်. ဘၣ်ဆၣ်သနာ်က့ ဧ့ၡီၤန့ၣ် ဆါအီၣ်ကွံာ်တၢ်ဆိၣ်ဂ့ၤလၢကဒိးန့ၢ်ဝဲ ဆူယၤကိာ် လၢအဆိလံၤလံၤလံန့ၣ်လီၤ. လၢန့ၣ်အမဲာ်ညါ, ဖဲပိာ်ခွါဖိသၣ်ခံဂၤ အိၣ်ဖျဲၣ်အခါန့ၣ် ကစၢ်ယွၤကတိၤပာ်စၢၤဝဲလၢ ယၤကိာ်ကန့ၢ်ဘၣ်တၢ်ဆိၣ်ဂ့ၤန့ၣ်လီၤ. ဒီးဟဲကဲထီၣ်ဝဲဒ်န့ၣ်လီၤ. အံၤစဲးဆိၣ်ဂ့ၤတ့ၢ်ဝဲဒၣ်အဖိခွါယၤကိာ်လီၤ.
လၢခံန့ၣ် ဖဲဧ့ၡီၤသ့ၣ်ညါဝဲ တၢ်ဂ့ၢ်အံၤအခါ အသးဒိၣ်ဆူၣ်တဖှိထီၣ်ယၤကိာ်န့ၣ်လီၤ. အသးထီၣ်ဝဲတုၤလၢ မ့ၢ်မၤသံဘၣ်ယၤကိာ်မး အသးကမံဝဲလီၤ. ရံးဘကၤနၢ်ဟူဝဲတၢ်ဂ့ၢ်အံၤဒီး အသးကိၢ်ထီၣ်နးမးလီၤသၢၣ်. လၢတၢ်န့ၣ်အဃိ, တဲဘၣ်အဝၤအံၤစဲးလၢ, ‘ယၤကိာ်စ့ၢ်ကီး မ့ၢ်ဟံးန့ၢ်ကနၤဧၣ်မုၣ်သၢပျၢၤ တၢ်ကကီဒံးလီၤ’.
တုၤနုၤတစု, အံၤစဲးကိးအဖိခွါယၤကိာ်ဒီး စံးဝဲဒၣ်, ‘ဟံးန့ၢ်နမါလၢကနၤဧၣ်မုၣ်တဂ့ၤ. လဲၤဆူနဖုဖုဘသူၤအ့လးအဟံၣ်ဒီး ဟံးန့ၢ်နမါလၢ အဖိခွါလၤဘၣ်အဖိမုၣ်တဂၤဂၤတက့ၢ်’ န့ၣ်လီၤ.
ယၤကိာ်ဒိကနၣ်အပါပၢ် အတၢ်ကတိၤဒီး လဲၤတၢ်လဲၤဖးယံၤဆူ အဘူးအတံၢ်အအိၣ်တၢ်လီၢ်ဝ့ၢ်ဟၤရၣ် တဘျီဃီန့ၣ်လီၤ.