VAMATI ava vavali va lisiga, ndi ngapi? Wa diva madina gawo ndi? Musani kuna kara Esau, ano mumati ogu ana kukunga nonzwi kuna kara Jakopo.

Esau naJakopo kwa kere vana womapange wovamati vaIsaka naRepeka. Guhyawo Isaka kwa here po unene Esau, morwa age kwa kere musani gomuwa makura nga reta nondya kepata va ya lye. Nye Repeka kwa here po unene Jakopo, morwa age kwa kere gokumwena, hena mumati gombili.

Zinyakuru Abirahamu simpe kwa kere muzuni, ntani kuvhura tu gazadare ko tupu asi ngapi Jakopo omu ga here kumupurakena age ta uyunga kuhamena Jehova. Abirahamu kwa ya fire age ana kara nonomvhura 175 apa va kere vamapange awo nomvhura 15.

Esau apa ga kere nomvhura 40 ta kwara vakadi vavali womosirongo saKanani. Eyi kwa guvisire oIsaka naRepeka unene, morwa vakadi ava kapi ngava karere Jehova.

Makura ezuva limwe tapa horoka sininke simwe esi sa ninkisire Esau a handukire unene mumbyendi Jakopo. Siruwo kwa sikire mo apa Isaka ga here kugava etungiko kwamunwendi gomukurona po. Morwa Esau kwa kere mukurona kwaJakopo, Esau kwa ndindilire a gwane etungiko eli. Nye posiruwo sa ka pita, Esau kwa randesere uhunga wendi wokugwana etungiko kwaJakopo. Ntani hena, pehampuruko lyovamati vavali ava, Karunga kwa tente asi Jakopo yige nga gwana etungiko. Ano eyi yiyo ya horokere. Isaka kwa geve etungiko kwamunwendi Jakopo.

Konyima, apa Esau ga ya yi zuvhire eyi, ta handukire Jakopo. Age kwa handukire unene nokutanta asi ta dipaga Jakopo. Repeka apa ga yi zuvhire eyi, makura ta kara nosinka sosinene. Makura ta tantere mugara gwendi Isaka asi: ‘Ayo ngayi kara udona sili nsene Jakopo nage nga kwara mukadi gumwe gomoKanani.’

Opo Isaka makura ta zigida munwendi Jakopo nokumutantera asi: ‘Wa ha kwara mukadi gomoKanani. Nye zende kembo lyonyokokuru Betuwere moHarani. Ka kware muna munwendi Rabani.’

Jakopo kwa purakenene koguhwe, makura poopo ta tameke rugendo rwendi rorure rokuza oku lya tungire ekoro lyendi koHarani.

Genesis 25:5-11, 20-34; 26:34, 35; 27:1-46; 28:1-5; Vahebeli 12:16, 17.