YINDENDE yole yayi yaswaswana kikilu. Ng’ozeye nkumbu zau? O nkondi i Esau, o mvungudi a mameme i Yakobo.

Esau ye Yakobo nsimba za Isaki yo Rebeka. Isaki w’esau wazolanga beni Esau, ekuma kadi nkondi ambote kakala. Watwasanga madia muna nzo. Kansi, Rebeka watoma zolanga Yakobo, kadi nlembami kakala.

Abarayama wa nkak’au wakinu zinga. O Yakobo wazolanga wa mambu ma Yave. Vava nsimba zalungisa mvu 15, Abarayama wafwa muna kimbuta kia mvu 175.

Vava Esau kalungisa mvu 40 wasompa akento wole esi Kenani. Ediadi diakendeleka kikilu Isaki yo Rebeka kadi akento awaya ke basambilanga Yave ko.

Lumbu kimosi, vabwa diambu diafila Esau mu fungila Yakobo wa mpangi andi makasi. Ifwene e ntangwa kwa Isaki ya sambula mwan’andi ambuta. Wau vo Esau wasunda Yakobo kimbuta, yandi wafwan’o tambula e nsambu. Kansi, Esau wakitekela e kimbuta kiandi kwa Yakobo. Vava bawutuka Yave wavova mpe vo o Yakobo yandi osambulwa. Idiau diavangama. O Isaki wasambula Yakobo wa mwan’andi.

Vava Esau kazaya wo wafungila kikilu Yakobo makasi. Wavava kumvonda. Vava Rebeka kazaya wo, watokana kwayingi. Wavovesa Isaki wa nkaz’andi vo: ‘Diavonza dikala ovo Yakobo osompele nkento muna wan’amakento a Kenani.’

Muna kuma kiaki, o Isaki obokele mwan’andi Yakobo yo kumvovesa vo: ‘Kubongela nkento muna wan’amakento a Kenani ko. Wenda kuna Karani, kuna nzo a Betwele wa nkak’aku, wabongela kûna nkento muna wan’a Labani.’

O Yakobo wawila s’andi yo kwenda kwa yitu yandi kuna Karani.