Chihande 17

Vapasa Vakulihandununa

VANA vamalunga vavali vali hano vanalihandununa chikuma, nyi chiku? Unavejiva majina avo tahi? Chinyanga ikiye Esau, kaha kanyike anakufunga mikoko ikiye Yakova.

Esau naYakova vapwile vapasa jaIsaka naLaveka. Sevo, Isaka, azangile Esau, mwomwo apwile chinyanga wamwaza anehelenga kulya kuli vatanga hembo. Oloze Laveka azangile Yakova, mwomwo apwile mwana wakuhola, wakuunda.

Kaka yavo Apalahama kwapwile wamutonyi, kaha tunahase kushinganyeka omu Yakova asakilenga kumwivwilila mwahanjika vyaYehova. Apalahama afwile hamyaka 175, oho vapasa hivali lyehi namyaka 15.

Esau hakuheta myaka 40, ambachile mapwevo vavali vakuKanane. Echi chavanehelele vaIsaka naLaveka ushona waunene, mwomwo mapwevo kana kavalemeselenga Yehovako.

Likumbi limwe kwasolokele chuma chimwe chize chalingishile Esau kwivwila matoto songo yenyi, Yakova. Likumbi atelelele Isaka kukisula mwanenyi watwatwa lyahetele. Esau hakupwa mukulwane kuli Yakova, afwelelele nge ikiye navakakisula. Oloze Esau alanjishile lyehi utwatwa vatelele kumukiswila kuli Yakova. Kaha nawa, likumbi vasemukile ava vana vavali, Kalunga ambile nge Yakova ikiye navakakisula. Kaha mukiko chasolokele. Isaka akiswile mwanenyi Yakova.

Jino Esau hakutachikiza chuma kana, apihililile naYakova. Apihililile chikuma nakwamba ngwenyi Yakova kuvanga akamujihe. Laveka hakwivwako, alizakaminyine chikuma. Ngocho alwezele lunga lyenyi Isaka ngwenyi: ‘Nachikapihya nge Yakova naikiye mwakambata pwevo wakuKanane.’

Kaha Isaka asanyikile mwanenyi Yakova nakumulweza ngwenyi: ‘Kanda mukambata pwevo wakuKananeko. Shina ukaye kwimbo lyakaka yove Mbetwele kulifuchi lyaHalane. Kambateho umwe havana vanatwove Lavane.’

Yakova evwililile ise, kaha hahaze vene akatukile ungeji wausuku nakuya kuvausoko wenyi vapwilenga kuHalane.

Kuputuka 25:5-11, 20-34; 26:34, 35; 27:1-46; 28:1-5; WavaHepeleu 12:16, 17.