Sturka 17

Sutki Nani Sat Wala Kan Ba

NAHA ra tuktan waitna wal kaikisma ba sat wala sa, rait apia? Witin nani nina dia makisa sapa nu sma ki? Daiwan aîkra ba Isau nina maki kan, bara syîp nani main kakaira ba Jekob nina maki kan.

Sutki bangwi kan. Bara Aisak Rebika wal witin nani aisika kan. Aisak ba Isau ra kau latwan kaikan, kan witin ba daiwan iki piaia dukyara utla ra bribal kan. Sakuna Rebika ba Jekob ra kau latwan kaikan, kan witin praut apu bara bawikira kan.

Damika Ebraham ba kau raya kan. Bara Jekob ai damika ba Jehova dukyara aisi kan pyua ra, walaia laik kan kaia sa. Sakuna Ebraham ba mani 175 bri kan taim pruan, baha pyua ra sutki nani ba 15 mani bri kan.

Isau ba 40 mani alkan pyua ra, mairin wal Kenan tasbaia wina brih marit takan. Baku daukan ba mita, Aisak Rebika wal uba sari takan, kan naha mairka nani ba Jehova ra mayunras kan.

Yu kum diara kum takan, bara baha dukyara Isau ba ai muihka Jekob wal uba ai kupia sauhkan. Aisak mita ai luhpia almukka ra blisin munaia pyua ba aimakan kan. Isau ba Jekob almukka kan, bara Isau ba baha blisinka briaia bila kaiki kan. Sakuna witin naha blisinka ba, pat Jekob ra atkan kan. Sutkika nani na aisubi takan pyua ra, Gâd mita Jekob blisinka bribia ba kaina manas win. Bara Gâd aisan ba kat takan, Aisak Jekob ra blisin munan.

Bara Isau naha nu takan pyua ra, Jekob wal uba ai kupia sauhkan. Witin uba ai kupia sauhkan ba mita, Jekob ra ikaia win. Rebika ba naha wali uba wari takan. Baha mita witin ai maîa Aisak ra naku win: ‘Yawan mapara uba trabil kabia Jekob sin Kenan mairka kum wal marit takbia kaka.’

Baha mita Aisak ba ai luhpia Jekob ra wini win: ‘Man Kenan mairka wal marit takpara. Baha watlika ra, Haran kuntrika ra was damikam Bityuil watla ra, bara baha ra tahtikam Laiban luhpia mairin kum wal marit taks.’

Jekob ba ai aisa bila wali, ai taya nani Haran ra iwi kan ba ra mahka impakan.

Blasi sturka 25:5-11, 20-34; 26:34, 35; 27:1-46; 28:1-5; Hibru nani 12:16, 17.