Tanojnots 17

Nenetsmej tein katkaj tamamej

TEL tamamej nejin ome konemej tein tikinita itech taixkopin, ¿melauj? ¿Tikmati imin tokay? Tatokakej motokaytia Esaú, uan okse tein kinpia ichkamej motokaytia Jacob.

Esaú uan Jacob katkaj nenetsmej, uan imin tatuan katkaj Isaac uan Rebeca. Isaac, kiteluelitaya Esaú, porin katka se kuali tatokakej uan kiniuikiliaya tein kikuaskej ichankauan. Sayoj ika, Rebeca kiteltasojtaya Jacob, porin amo katka eliuis.

Teueyitat Abraham nemiaok, uan Jacob kiteluelkakia maj kitapoui tein Jiova kichiua. Abraham momikilij keman kipiaya 175 xiujmej, keman nenetsmej kipiayaj 15 xiujmej.

Keman Esaú kipiaya 40 xiujmej, monamiktij imiuan ome siuamej tein nemiaj itech tal tein pouia Canaán. Tein kichiuak, kinteltayokoltij Isaac uan Rebeca, porin nejon siuamej amo kiueyichiuayaj Jiova.

Satepan, se tonal mochiuak se teisa tein kichiuak maj Esaú kitelkualaui ikniuj Jacob. Ajsik tonal keman Isaac yaya kimakati ikoneuj tein tayekanaya se tatiochiualis. Uan kemej Esaú tayekanaya, yejika kichiaya maj yejua kimakakan. Sayoj ika, yej amo kipatiujitaya tatiochiualis tein kinamikia kiselis, yejika kinamakiltij Jacob. No, keman konemej nenkej, Dios kijtojka ika Jacob kiseliskia tatiochiualis. Uan yejua tein mochiuak, Isaac kimakak tatiochiualis ikoneuj Jacob.

Satepan, keman Esaú kimatik tein mochiuak, kitelkualauij Jacob. Kemej tel kualantoya, yejika kijtoj ika kimiktiti ikniuj. Rebeca moteltekipachoj keman kimatik toni yaya kichiuati Esaú. Yejika, kiiluij inamik: ‘Okachi techteltayokoltis komo Jacob no monamiktia iuan se siuat tein nemi Canaán’.

Yejika Isaac kinotsak ikoneuj Jacob uan kiiluij: ‘Amo ximonamikti iuan se siuat tein nemi Canaán. Ta, xiouj Harán kampa nemi moueyitat Betuel, uan ximonamikti iuan se iichpoch motaytsin Labán’.

Jacob kitakamatik ipopaj, uan niman moojketsteuj Harán kampa nemiaj ichankauan.

Génesis 25:5-11, 20-34; 26:34, 35; 27:1-46; 28:1-5; Hebreos 12:16, 17.