TLAPOUALISTLI 17

Koatsitsintin tlen okatkaj tlatlamantli

TELPOKAMEJ tlen tikinmitaj yetokej tlatlamantli, ¿amo melauak? ¿Tikmati ken intoka? Akin kintemoa uan kinmiktia yolkamej itoka Esaú, uan akin kinmaluia ichkamej itoka Jacob.

Esaú uan Jacob okatkaj koatsitsintin, yejuan okatkaj ikoneuan Isaac uan Rebeca. Isaac, okiyolpaktiaya miak Esaú, pampa okimatiaya kintemos uan kinmiktis yolkamej uan okinuikiliaya ichanejkauan pampa tlakuaskiaj. Maski ijkon, Rebeca okachi okitlasojtlaya Jacob, pampa amo san niman okualaniaya uan okatka yolyamanki.

Inkojkol Abrahán ok yoltoka, uelis timokuayejyekoskej ken Jacob okipaktiaya kikakis Abrahán ijkuak okitlapouiaya itech Jehová. Saiktlami, Abrahán omikik ijkuak okipiaya 175 xiuitl, ijkuak koatsitsintin okipiayaj 15 xiuitl.

Ijkuak Esaú okipiaya 40 xiuitl, omonamikti iuan ome siuamej tlen ochantiayaj Canaán. Nin okinyolkoko miak Isaac uan Rebeca, pampa ninmej siuamej amo okiueyichiuayaj Jehová.

Ijkuakon, se tonal opanok itlaj tlen okichi Esaú ma kualani miak iuan ikni Jacob. Oajsik tonal ijkuak Isaac kimakaskia se tlateochiualistli ikone akin tlayekana. Ken Esaú okiyekanaya Jacob, Esaú okichiaya kiselis non tlateochiualistli. Maski ijkon, Esaú amo okipatioitak nin tlateochiualistli tlen kiseliskia, pampa okipatili ikni ika se tlakuali. Noijki, ijkuak ninmej ome konemej otlakatkej, toTajtsin Dios okijto Jacob kiseliskia nin tlateochiualistli. Uan ijkon opanok. Isaac okimakak tlateochiualistli ikone Jacob.

Satepan, ijkuak Esaú okimatki nin, okualanki miak iuan Jacob. Pampa sapanoa okualanki okijto kimiktiskia Jacob. Ijkuak Rebeca okimatki nin, omotekipacho miak. Ik non, okilui inamik Isaac: ‘Melauak techyolkokos tla Jacob noijki monamiktis iuan se siuatl tlen chanti Canaán’.

Ik non, Isaac okinotski ikone Jacob uan okilui: ‘Amo ximonamikti iuan se siuatl tlen chanti Canaán. Okachi kuali, xio ichan mokojkol Betuel tlen chanti Harán. Ximonamikti iuan se ichpoch Labán ikone Betuel’.

Jacob okitlakamatki itajtsin, uan san niman oyajki Harán kanin ochantiayaj ichanejkauan.

Génesis 25:5-11, 20-34; 26:34, 35; 27:1-46; 28:1-5; Hebreos 12:16, 17.