OVAKUENDYE ava vevali vekahi apa velikalela, ine hatyoko? Ove uvei? Omuyevi utiwa o Esau, omunthita wonongi o Jako.

Esau na Jako ankho ovana vomapaha va Isake na Rebeka. Isake ankho uhole unene Esau. Mokonda ankho omukongo, weeta okulia pala ombunga. Anthi, Rebeka ankho uhole unene Jako. Mokonda ankho omukuendye umue omutendi nokuahiliya.

He mbuale Abraiau ankho una omuenyo. Jako ankho utyihole okutehelela he mbuale putyina apopia kombinga ya Yehova. Etyi pakala Abraiau ankhi. Ankho una omanima 175, iya omapaha ankho ena omanima 15.

Puetyi Esau ankho ena omanima 40, anepe ovakai vevali vomo Kanaa. Iya otyo tyanumanesile unene Isake na Rebeka. Mokonda ankho ovakai ovo kavafende Yehova.

Onthiki imue papita otyipuka tyimue. Iya Esau anumana unene nondenge yae Jako. Ankho omuvo wehikapo pala Isake aavele ononkhano onongwa omona wae wotyiveli. Mokonda Esau ankho omukulu ku Jako, Esau ankho ukevelela okutambula ononkhaneno ombo onongwa. Anthi, Esau ankho walandesale ouveli wae ku Jako. Tupu etyi vatyitwa, Huku wapopile okuti Jako oe makatambula ononkhano onongwa. Iya atyiende umue ngotyo. Isake waavela onokhaneno onongwa omona wae Jako.

Etyi Esau etyiiva, anumana na Jako. Wanumanene unene ahande okuipaa Jako. Etyi Rebeka etyiiva asukalala unene. Iya apopila omulume wae Isake ati: ‘Inkha Jako nae unepa omukai womo Kanaa, matyikala omapita unene.’

Moluotyo, Isake waihana Jako, emupopila okuti: ‘Wahanepe omukai womo Kanaa. Enda keumbo liaho mbuale Betuele ko Harã. Kanepe povana va Labau.’

Jako etavela ku tate yae, iya alingi oungendi alo ko Harã, ankho kukala ombunga yae.