Ekitebyo 17

Empasha Ezaabaire Ziri ez’Omutaano

ABOOJO babiri abo buzima tibarikushushana, tikwo kiri? Noomanya amaziina gaabo? Omuhiigi ni Esau, kandi omwojo omuriisa w’entaama ni Yakobo.

Esau na Yakobo bakaba bari amahasha batabani ba Isaaka na Rebeka. Ishebo Isaaka, akaba naakunda Esau munonga, ahabw’okuba akaba ari omuhiigi murungi kandi akaba areetera ab’omu ka eky’okurya. Kwonka Rebeka akaba naakunda Yakobo munonga, ahakuba akaba ari omucureezi, kandi ow’obusingye.

Ishenkurubo Abrahamu akaba akihuriire, mbwenu nitubaasa kuteera akashushani oku Yakobo yaabaire akunda kuhurikiriza Ishenkuru arikugamba aha birikukwata ahari Yehova. Bwanyima Abrahamu akafa aine emyaka 175 y’obukuru, obwe aga mahasha gakaba gaine emyaka 15 y’obukuru.

Esau ku yaahikize emyaka 40, yaashwera abakazi babiri kuruga omu nsi ya Kanaani. Eki kikareetera Isaaka na Rebeka enaku nyingi, ahakuba abakazi aba bakaba batarikuramya Yehova.

Reero mbwenu eizooba rimwe, haine ekyabaireho kyareetera Esau kugirira Yakobo omurumuna ekiniga kingi. Obwire bukahika obu Isaaka yaabaire arikuza kuha omutabani omukuru omugisha. Ahabwa Esau kuba yaabaire ari mukuru wa Yakobo, Esau akaba aine amatsiko kutunga omugisha ogu. Kwonka Esau akaba yaagurize Yakobo obukuru bwe bw’okutunga omugisha. Manya obu aba boojo baazaarwa, Ruhanga akaba yaagizire ngu Yakobo akaba naija kutunga omugisha. Eki nikyo kyabaireho. Isaaka akaha omutabani Yakobo omugisha.

Bwanyima, Esau ku yaamanyire ekyabaireho, yaagirira Yakobo ekiniga. Akagira ekiniga kingi kuhika n’aha kugira ngu akaba naaza kwita Yakobo. Rebeka ku yaakihuriire, yaayerarikirira munonga. Nikwo kugambira iba Isaaka ati: ‘Nikiija kuba eky’obusaasi Yakobo ku araashwere omwe aha bakazi ba Kanaani.’

Aho Isaaka yaayeta omutabani Yakobo yaamugira ati: ‘Otakaashwera omukazi kuruga Kanaani. Kureka, gyenda oze omu b’enju ya shwenkuru yaawe Besueli omuri Harani. Oshwere omwe ahari bahara b’omutabani Labaani.

Yakobo akahurikiza eby’ishe, kandi ahonaaho yaatandika orugyendo rwe oruraingwa kuza omu banyabuzaare abaabaire nibatuura omuri Haraani.

Okutandika 25:5-11, 20-34; 26:34, 35; 27:1-46; 28:1-5; Abaheburaayo 12:16, 17.