17 yachachiy

Iskay mana rikchʼakuq wawqis

KAY iskay yuqallitusqa mana rikchʼakunkuchu, ¿ichari? ¿Ima sutikunku? Kay flechayuqqa Esaú sutikun, ovejitasta michiqri Jacob sutikun.

Esaú Jacobwan jukllapi qhipan qhipanta nacekurqanku, Isaacpa Rebecap wawasnin karqanku. Esauqa, animalkunata japʼispa mikhunata apamusqanrayku tatanwan munachikurqa. Rebecataq Jacob tiyasqa sunqu kasqanrayku payta munakuq.

Jatun tatanku Abrahamqa kawsakuchkallarqaraq. Jacobqa Abraham Jehovamanta parlariptin maytacha uyariyta munarqa. Abrahamqa allchhisnin 15 watayuq kachkaptinku, 175 watayuq wañupurqa.

Esaú 40 watayuq kachkaspa Canaanmanta iskay warmiwan casarakurqa. Tatasnintaq chay warmikuna mana Jehovata yupaychasqankurayku mayta llakikurqanku.

Juk pʼunchayqa Esaú, Jacob wawqinwan mayta phiñakurqa. Chay kutiqa Isaac kuraq wawata tʼinkanan karqa. Esauqa kuraq wawa karqa. Kuraq kayninta Jacobman ranqhaykuspapis, Esauqa chay tʼinkata suyachkarqa. Diostaq paykuna paqarikuchkaptinku, Jacob tʼinkata japʼinanta nirqa. Chaytaq juntʼakun, Isaacqa Jacobta tʼinkarqa.

Esaú chayta yachaytawan Jacobwan mayta phiñakurqa. Phiñakuyninpiqa, Jacobta wañuchisaq, nispa nirqa. Chayta yachaspataq Rebeca llakikurqa. Chayrayku qusanta jinata nirqa: ‘Sichus Jacobpis kay Canaán llaqtayuq warmisllawantaq casarakunqa chayqa, wañupuyllataña munani. ¿Imapaq kawsasaqri?, nispa.

Chayrayku Isaacqa Jacobta jinata nirqa: ‘Qamqa amapuni Canaán llaqtayuq warmiwan casarakunkichu. Manaqa riy jatun tatayki Betuelpa wasinman, chaypitaq casarakunki tiyuykip Labanpa juknin kaq ususinwan’, nispa.

Jacobqa tatanta kasukuspa chay ratu maypichus unay tatanpa ayllun kachkarqa chayman ripurqa.

Génesis 25:5-11, 20-34; 26:34, 35; 27:1-46; 28:1-5; Hebreos 12:16, 17.