RI KEBʼ alabʼom kawil cho ri wachbʼäl e junam täj, ¿la je kawil at? ¿La awetaʼm su kibʼiʼ? Ri ala ajchapal chiköp ubʼiʼ Esaú, ri ala kuyuqʼuj chij ubʼiʼ Jacob.

Esaú rukʼ Jacob e yoʼx, wariʼ kalkʼwal Isaac rukʼ Rebeca. Ri Isaac kitat, sibʼalaj xraj ri Esaú, rumal che sibʼalaj utz ajchapal chiköp xuqujeʼ kukʼam lo kʼi su täq ktijowik rech ufamilia pa kachoch. Are kʼu ri Rebeca sibʼalaj xraj ri Jacob rumal che sibʼalaj utz, kʼot chʼoj kubʼano xuqujeʼ kpet riwal chanim.

Ri kimam ubʼiʼ Abrahán kʼas na, ri Jacob sibʼalaj utz kuto chiʼ ri Abrahán kchʼaw chirij ri Jehová. Abrahán xkamik chiʼ kʼo chi 175 ujunabʼ, chiʼ ri täq yoʼx kʼo 15 kijunabʼ.

Chiʼ Esaú kʼo 40 ujunabʼ xkʼuleʼ kukʼ kebʼ ixoqibʼ rech ri tinamit Canaán. Wariʼ xuya bʼis chike ri Isaac rukʼ Rebeca, rumal che ri täq ixoqibʼ riʼ kkeya ta uqʼij ri Jehová.

Kʼo jun qʼij che ri Esaú xpe jun nimalaj riwal che Jacob. ¿Suche? Chiʼ xopan ri qʼij che ri Isaac xuya nimalaj utzilal che ri nabʼeʼal ukʼojol. Rumal che ri Esaú are ri nabʼeʼal ukʼojol ri Isaác, ri Esaú kubʼij pa ranimaʼ che areʼ (o rë) kyaʼ we utzilal che. Tekʼuriʼ Esaú ukʼayim (ukʼin) chik ri täq tewchibʼäl che ri Jacob. Xuqujeʼ chiʼ xekʼejeʼ ri kebʼ akʼalabʼ, ri Ajawaxel xubʼij che Jacob kukʼam ri tewchibʼäl. Are waʼ xbʼantajik. Ri Isaac xuya tewchibʼäl che ri Jacob.

Tekʼuriʼ, chiʼ ri Esaú xuta wariʼ, xpe jun nimalaj riwal chirij ri Jacob. Petinäq jun nimalaj riwal rumal waʼ xubʼij che kukamsaj na ri Jacob. Chiʼ ri Rebeca xretaʼmaj wariʼ, xpe jun nimalaj kʼäx pa ranimaʼ. Rumal waʼ, xubʼij che ri Isaac: ‹We ri Jacob kkʼuleʼ rukʼ jun chike ri ixoqibʼ e kʼo waral pa Canaan, are utz na we kinkämik›.

Rumal laʼ Isaac xusikʼij ri Jacob tekʼuriʼ xubʼij che: ‹Mat kʼuleʼ rukʼ jun ali rech Canaán. Jat pa rachoch a mam Betuel pa Harán. Chatkʼuleʼ rukʼ jun chike umiʼal ri Labán›.

Ri Jacob xunimaj ri utat, chanim xumaj bʼi jun nim bʼe rech kopan pa ri tinamit Harán pa e kʼo wi ri ufamilia.