Tantara 17

Hamba Tsy Nitovy

TSY mitovy vatane ajà lahilahy roe eto reto, sa tsy zay? Hainao va ty anaran-droze? Esao aze mitifitsy io, Jakoba aze mikarakara aondry io.

Anan’i Isaka noho Rebeka Jakoba noho Esao; hamba roze. Tea an’i Esao, Isaka, satria mahay mihaza ie sady mpanday hany ho ahi’ty fianakavia an-trano ao. Fe Rebeka tea an’i Jakoba, satria mipetrapetrake ie, sady tsy masiake fa soa fanahy.

Mbo velo Abrahama razan-droze tami’zay. Azontsika eritserety fa le nahafaly an’i Jakoba biby ty nijànjy an’i Abrahama niresake tamine mikasike an’i Jehovah. Fe nimaty Abrahama laha fa 175 tao, vo 15 tao hamba reo tami’zay.

Laha fa 40 tao Esao le nanambaly ampela roe baka amy tany Kanana ane. Tsy nitean’i Isaka noho Rebeka raha zay fa nampalahelo an-droze, satria tsy nanompo an’i Jehovah ampela reo.

Ndraike andro, le nisy raha niseho, ka nampeloke an’i Esao tamin’i Jakoba rahalahine. Niavy ty fotoa hanomezan’i Isaka tsodrano anake lahine voalohane iny. Nitamà hahazo tsodrano io Esao, satria ie ro zokin’i Jakoba. Fe fa taloha raha zay Esao ro fa namarotse ty fizokiane tamin’i Jakoba. Tamy fotoa nahaterahan-droze roe lahy kea, le fa nivòla Andranahare fa Jakoba ro hahazo tsodrano. Ka le zay vatane ty raha niseho. Nanome tsodrano an’i Jakoba Isaka.

Laha fa nihain’i Esao raha io tafara atoy, le neloke biby tamin’i Jakoba ie. Neloke maré ie, ka nivòla fa hamono an’i Jakoba. Natahotse biby Rebeka laha fa naharé raha io. Ka hoy ty asane tamin’i Isaka valine: ‘Ho loza laha mangalake valy ampela kananita reo kea Jakoba.’

Nikaike an’i Jakoba Isaka ka nanao hoe: ‘Ka manambaly ampela kananita mihitsy iha. Fa ndahàna mandeha an-tranon’i Betoela, razanareo mipetrake a-Harana ane, ka alao valy ty anak’ampelan’i Labana anake lahine.’

Nijànjy noho nanorike soa ty safà’ty babane Jakoba, ka tsy nandìny ela ie, fa nandeha a-Harana ane malaky, tanà misy ty longone.

Genesisy 25:5-11, 20-34; 26:34, 35; 27:1-46; 28:1-5; Hebreo 12:16, 17.