DEN tu boi dya no de a srefi, a no so? Yu sabi fa den nen? Na ontiman na Esau èn a boi di e prei nanga a skapu na Yakob.

Esau nanga Yakob ben de wan twelengi. Den ben de manpikin fu Isak nanga Rebeka. A papa, Isak, ben lobi Esau tumusi, fu di a ben de wan bun ontiman, di ben tyari meti kon gi a famiri fu nyan. Ma Rebeka ben lobi Yakob moro, bika a ben de wan tiri boi di no ben lobi trobi.

A granpapa fu den, Abraham, ben de na libi ete. Wi kan frustan fa Yakob ben lobi fu arki Abraham te a ben e fruteri fu Yehovah. Te fu kaba, Abraham ben dede di a ben abi 175 yari. A twelengi ben abi 15 yari na a ten dati.

Di Esau ben abi 40 yari, a ben trow nanga tu uma fu a kondre Kanan. Disi ben gi Isak nanga Rebeka furu sari, bika den uma disi no ben e anbegi Yehovah.

Ne wan dei wan sani pasa, di meki Esau atibron srefisrefi nanga en brada Yakob. A ten ben doro fu Isak ben gi en moro bigi manpikin wan blesi. Fu di Esau ben moro bigi leki Yakob, meki a ben fruwakti fu kisi a blesi disi. Ma Esau ben seri a reti disi na fesi kaba gi Yakob. Gado ben taki tu na a ten di a mama ben meki ala tu boi, taki Yakob ben sa kisi a blesi. Èn so a ben pasa tu. Isak ben gi en manpikin Yakob a blesi.

Bakaten, di Esau ben yere fu disi, en ati ben bron nanga Yakob. A ben taki dati a ben o kiri Yakob. Di Rebeka ben yere fu dati, a ben broko en ede srefisrefi. Fu dati ede a ben taigi en masra Isak: ’A sa de wan ogri sani efu Yakob ben sa trow tu nanga wan fu den uma fu Kanan.’

Ne Isak ben kari en manpikin Yakob, a ben taigi en: ’Yu no musu trow nanga wan uma fu Kanan. Na presi fu dati, go na a oso fu yu granpapa Betuel na Haran. Trow nanga wan fu den umapikin fu en manpikin Laban.’

Yakob ben arki en papa. A ben bigin wantewante fu waka a langa pasi go na Haran, pe en famiri ben e libi.