UYABABONA yini labafana lababili labakulesitfombe kutsi abafanani? Uyawati yini emagama abo? Lona lotingelako ngu-Esawu, bese kutsi lona lonakekela timvu yena nguJakobe.

Bo-Esawu naJakobe bebangemadvodzana a-Isaka naRebheka. Bebangemaphahla. Isaka abetsandza Esawu kakhulu, ngoba abekwati kutingela futsi abebuya nenyama lebeyidliwa ngumndeni wonkhe. Rebheka yena abetsandza Jakobe ngoba abengumfana lothulile.

Abesaphila-ke mkhulu wabo Abrahama ngaleso sikhatsi. Cabanga nje kutsi bekumjabulisa njani Jakobe kulalela mkhulu wakhe amcocela ngaJehova. Kwatsi lamaphahla sekaneminyaka lengu-15 budzala, Abrahama wafa, ngaleso sikhatsi yena bese aneminyaka lengu-175 budzala.

Esawu kwatsi nakaneminyaka lengu-40 budzala, watsatsa bafati lababili eveni laseKhenani. Kwabavisa buhlungu kakhulu bo-Isaka naRebheka loko, ngoba labafati baseKhenani bebangamkhonti Jehova.

Ngalelinye lilanga kwenteka intfo letsite leyenta Esawu wamtfukutselela kakhulu umnakabo. Kwefika sikhatsi sekutsi Isaka abusise indvodzana yakhe lendzala. Phela njengoba Esawu abemdzala kunaJakobe, abelindzele kutsi kubusiswe yena, kepha wesuke watsengisela umnakabo lelolungelo lakhe lekutfola sibusiso. Nkulunkulu abevele ashito nabatalwa labafana kutsi nguJakobe labetawubusiswa. Nguloko-ke lokwenteka, Isaka wavele wabusisa yena.

Watsi nje Esawu nakakuva loko, wamtfukutselela umnakabo. Watfukutsela waze watsi utambulala. Abekhatsateke kakhulu Rebheka nakakuva loko, waze watsi ku-Isaka: ‘Kungaba kubi kakhulu nangabe Jakobe angatsatsa umfati waseKhenani.’

Ngaso leso sikhatsi Isaka wavele wabita Jakobe watsi kuye: ‘Ungamtsatsi umfati kulamaKhenani. Hamba uye kamkhulu wakho Bethuweli eHarani, utitsatsele khona umfati emadvodzakatini aLabani.’

Jakobe wamlalela babe wakhe. Ngekushesha watsatsa luhambo loludze waya eHarani lapho kwakuhlala tihlobo takhe khona.