LABARIK mane naʼin-rua neʼe la hanesan, loos ka lae? Hatene sira-nia naran ka lae? Labarik neʼebé kasadór mak Esaú, no labarik neʼebé hein bibi mak Jacob.

Esaú no Jacob mak Isaac no Rebeca nia oan-kaduak. Aman Isaac gosta tebes Esaú, tanba nia matenek atu kasa animál no lori naʼan mai atu han. Maibé, Rebeca hadomi liu Jacob, tanba nia maus no hakmatek.

Avó Abraão moris hela, no karik Jacob kontente tebes bainhira avó konta istória kona-ba Jeová. Ikusmai, Abraão mate kuandu tinan 175, tempu neʼebá oan-kaduak neʼe tinan 15.

Bainhira Esaú tinan 40, nia kaben ho feto naʼin-rua husi rai Kanaan. Ida-neʼe halo Isaac no Rebeca triste loos, tanba feto neʼe la adora Jeová.

Loron ida, buat ruma akontese neʼebé halo Esaú hirus tebes ba nia alin Jacob. Tempu toʼo mai ba Isaac atu fó bensaun espesiál ida ba nia oan primeiru. Tanba Esaú mak maun, nia hanoin katak nia sei simu bensaun neʼe. Maibé uluk, Esaú faʼan tiha ona direitu atu simu bensaun neʼe ba Jacob. No mós, bainhira oan naʼin-rua neʼe foin moris, Maromak hatete katak Jacob mak sei simu bensaun neʼe. No ida-neʼe akontese duni. Isaac fó bensaun neʼe ba Jacob.

Depois, kuandu Esaú hatene saida mak akontese, nia hirus tebes ba Jacob. Nia hirus toʼo nia dehan katak nia sei oho Jacob. Bainhira Rebeca rona kona-ba ida-neʼe, nia sente laran-susar tebes. Nuneʼe, nia dehan ba nia laʼen, Isaac: ‘Ladiʼak tebes se Jacob mós kaben ho feto ida husi Kanaan.’

Nuneʼe, Isaac bolu nia oan Jacob no dehan: ‘Labele kaben ho feto ida husi Kanaan. Diʼak liu atu bá ó-nia avó Betuel nia uma iha Haran. Betuel nia oan-mane Labão iha oan-feto sira, kaben ho feto ida husi neʼebá.’

Jacob rona ba nia aman, no hahú kedas laʼo-rai dook toʼo nia família nia rai iha Haran..