17-нҗи хекая

Бир-бирине меңземейән экизлер

БУ ОГЛАНЛАР бир-бирине асла меңземейәр, шейле герек? Оларың адыны билйәңми? Ав авлап йөрен огланың ады Эсав, гузулары бакып йөрен огланың ады болса Якуп.

Бу экизлер Ысхак билен Ребеканың огуллары. Ысхак Эсавы говы гөрйәрди, себәби ол өкде авчыды ве машгала үчин ав гетирйәрди. Эмма Ребека оглы Якубы хас говы гөрйәрди, себәби ол ювашды.

Шол вагтлар оларың гарры атасы Ыбрайым дириди. Якуп онуң Ехова барадакы берйән гүррүңлерини диңлемеги халаярды. Ыбрайым 175 яшында арадан чыкды. Экизлер шол вагт он бәш яшларындады.

Эсав 40 яшанда кенганлы ики гыза өйленди. Бу Ысхак билен Ребеканы гаты гынандырды, себәби ол гызлар Ехова сежде этмейәрди.

Соңра бир вака болды. Шол себәпли Эсав доганы Якуба гаты гахарланды. Ысхагың улы оглуна ак пата бермели вагты гелди. Эсав Якупдан улы боланы үчин, элбетде, пата аларын өйдйәрди. Йөне ол пата алмак хакыны Якуба сатыпды. Шейле-де огланлар догланда патаны Якубың алҗагыны Худай өңүнден айдыпды. Шейле-де болды. Ысхак оглы Якуба пата берди.

Эсав муны биленде, Якуба гаты гахарланды. Шейле бир гахарланды велин, хатда Якубы өлдүрҗекдигини айтды. Муңа Ребека ховсала дүшүп, адамсы Ысхага: «Якуп кенган гызларындан өзүне аял алса, чыдап болмаз» дийди.

Шонда Ысхак оглы Якубы чагырып: «Кенганлылара өйленме. Бабаң Бекуэлиң яшаян ери Харана гит-де, онуң оглы Лабаның гызларының бирине өйлен» дийип, маслахат берди.

Якуп какасына гулак асып, шол бада гарындашларына тарап Харана узак ёла дүшди.

Барлык 25:5—11, 20—34; 26:34, 35; 27:1—46; 28:1—5; Еврейлер 12:16, 17.