JA CHABʼ kerem waxa wila bʼa dibujo mi junukxta ja smodoʼe. ¿Wan maʼ xa naʼa jas sbʼiʼile? Ja maʼ yaman yuj splecha sbʼiʼil Esaú, jaxa maʼ wan stalnajel cheji sbʼiʼil Jacob.

Ja chabʼ keremtik it ja yuntikil loj ja Isaac sok ja Rebeca. Ja Isaaki ja jel lek xyila ja Esaú yujni jel lek smila chanteʼik ja bʼa yoj kʼuli sok yuja wa xyiʼajan waʼelal ja bʼa naʼitsi. Pe ja Rebeca ja jel syajtay ja Jacobi yujni ja yeʼn jel junkʼujol sok mi sleʼa tiro.

Ja stataweloʼe Abrahani meto xchami, janekʼto maʼ gusto xyabʼ ja Jacobi smaklajel ja statawelo stajel tiʼal sbʼaja Jyobaji. Tixa cham ja Abrahán yajni ayiʼoj 175 jabʼili, yajni ja chabʼ kerem loji ayiʼoje 15.

Yajni Esaú ayxa yiʼoj 40 jabʼil, nupanisok chabʼ ixuk bʼa slujmalil Canaán. Ja it jelni chamskʼujole ja Isaac sok ja Rebeca yujni ja ixuk jumasaʼ it mini xyaʼteltaye ja Jyobaji.

Anto, jun kʼakʼu ay jas ekʼi bʼa jel tajki ja Esaú sok ja yijtsʼin Jacobi. Kʼot ja tyempo ja Isaac oj ya koʼuk jun slekilal ja bʼajtan yunini. Yujni ja Esaú yeʼn ja bʼankilal yuja Jacobi, ja yuj ja Esaú yeʼnani wa smajla oj ajuk yi ja it. Pe ja yeʼn yata yi ja yijtsʼin ja jas wa sbʼajini yuj jun sekʼ waʼelal. Chomajkil yajni pojkiyeʼi, ja Dyosi yalunej yeʼnani oj sbʼajuk ja it ja Jacobi, sok jaʼa it ja jas ekʼi. Ja Isaaki ja ya koʼ sbʼaj ja yunin Jacobi ja jas wa sbʼajin ja Esaú.

Tsaʼan, yajni ja Esaú yabʼi ja jas wa sbʼajini yeʼnxa sbʼaj ja Jacobi, tajki sok ja yijtsʼini. Jel tajki ja yuj yala oj smil ja Jacobi. Yajni ja Rebeca yabʼi, jel chamskʼujol. Ja yujil, yala yabʼ ja statam Isaaki: «Mixa oj kuchkuj ja ta Jacobi chomajkil xnupanisok june ja bʼa mentik ixuk bʼa Canaani».

Ja yujil ja Isaac spaya ja yunin Jacob sok ti yala yabʼ: «Mok nupanan sok jun ixuk bʼa Canaán. Mas lek, kaʼax bʼa Harán bʼa snaj ja wa tatawelo Betuel. Nupanan sok june ja bʼa yakʼixuk ja yunin ja wa tiyo Labani».

Jacob skʼuʼan yi ja stati sok stulu yi ja najat bʼejyeli man Harán, bʼa kulan ja spamilya jumasaʼ.