ÍKSÏ tsimani tumbicha engaksï dibujurhu jaka, nóksï májkueni járhasti, ¿no ísïski? ¿Mítiskiri náksï arhinhasïni? Enga kʼuanikutarakuani kámani jaka, Esauesti, ka enga karichichani jingoni jaka, Jakobuesti.

Esau ka Jakobu kuatichesptiksï ka Isaki ka Rebekaeri uájpechesptiksï. Isaki kánikua uékasïrendi Esauni jimboka jorhenaspka animalichani jupiani ka ísï pásïrendi tʼirekua para imeri kʼumanchikua. Peru Rebeka sánderu uékasïrendi Jakobuni, jimboka kaxumbitispka ka sési kámpini.

Imecheri tatita Abraani útasï irekaspti, ka úsïngachi eranhaskani na enga xáni tsitienga Jakobu kurhajchani enga Jeobaeri ambe uandaenga. Abraani 175 uéxurhini jatiri uarhispti, engaksï kuaticha 15 uéxurhini jatiripka.

Ka enga Esau 40 uéxurhini jatiripka, tembuchaspti tsimani kananeaechani jingoni. I ambe kánikua no sési pʼikuastaspti Isakini ka Rebekani, jimbokaksï i uarhiticha nóksï kómarhisïrenga Jeobani.

Jiájkani ma jurhiatikua, nitamaspti ambe ma enga úpka eska Esau kánikua ikiapiringa Jakobuni jingoni. Niáraspti jurhiatikua, enga Isaki újchakurapiringa Esauni. Jimboka Esau sánderu kʼérispka eska Jakobu, erokuarhixapti i újchakurakuani. Peru újchakurakuani enga Esau jatsipka para intsïnhani, Jakobuni atarakuntasptia. Ístu, engaksï i tumbicha andajpenupka, Tata Diosï uandaspti eska Jakobusï újchakuranhapiringa. Ísï jimbo, Isaki, Jakobuni újchakuraspti.

Enga Esau mítipka i ambe, kánikua ikiaspti Jakobuni jingoni. Xáni ikiaspti, enga jamberi uandapka eska uándikupiringa. Enga Rebeka mítipka i ambe, kánikua uandanhiaspti. Ísï jimbosï arhipti imeri uámba Isakini: ‘Sánderu kʼéri ma uandanhiateuati enga Jakobujtu tembuchaska Kanaani anapu uátsïni ma jingoni’.

Ísï jimbo, Isaki uandajpaspti Jakobuni ka arhispti: ‘Asï tembucha Kanaani. Sánderu sési, ni ireta Arani, jini enga irekaka chíti tatita Betueli, ka tembucha Labaniri uátsï ma jingoni’.

Jakobu kurhajchaspti, ka niraspti ireta Arani, jima engaksï irekapka imeri parienticha.