БО оолдар бот-боттарынга көңгүс дөмей эвес, ындыг-дыр бе? Оларның аттарын билир сен бе? Аңнап турар оолдуң ады Иса́в, а хой кадарып турар оолду Иа́ков дээр.

Ийистер Иса́в биле Иа́ков — Исаа́к биле Реве́кканың оолдары. Ачазы Исаа́к Иса́вка дыка ынак турган, чүге дизе ол эки аңчы болгаш бо-ла өг-бүлезинге чем эккээр турган. Ынчалза-даа Реве́кка Иа́ковка ынак турган, чүге дизе ол топтуг-томаанныг оол болган.

Ынчан оларның кырган ачазының ачазы Авраа́м ам-даа дириг турган болгаш, Иегованың дугайында ооң чугааларын дыңнаарынга Иа́ков кайы-хире ынак турганын билип болур бис. Авраа́м 175 харлыында мөчээн, ол үеде ийистер 15 харлыг турган.

40 харлыында Иса́в Ханаа́н черинден ийи херээжен кижиге өгленип алган. Ол чүүл Исаа́к биле Реве́кканы дыка муңгараткан, чүге дизе ол херээженнер Иеговага чүдүвейн турган.

Оон бир болуушкун болган, ол дээш Иса́в бодунуң дуңмазынче хөлчок хорадай берген. Исаа́ктың улуг оглун йөрээр үези чедип келген. Иса́в Иа́ковтан улуг болганда, ол йөрээлди алыр деп идегеп турганы чугаажок. Ынчалза-даа ол ооң мурнунда-ла Иа́ковка бодунуң йөрээл алыр эргезин садыпкан. Оон аңгыда, оолдар төрүттүнүп кээрге, йөрээлди Иа́ков алыр деп, Бурган баш удур чугаалаан. Шак ындыг болган. Исаа́к Иа́ков деп бодунуң оглун йөрээген.

Сөөлүнде Иса́в ол дугайында билип кааш, Иа́ковка дыка хорадаан. Хөлчок хорадааны-биле Иа́ковту өлүрерин безин, ол аазаан. Ол чүүл Реве́кканы хөлчок дүвүреткен. Ынчангаш ол ашаа Исаа́кка чугаалаан: ‘Бир эвес Иа́ков база Ханаа́нның херээженнеринден кадай алыр болза, шыдажыр арга чок-тур’.

Ынчан Исаа́к оглу Иа́ковту кыйгыргаш, чугаалаан: ‘Ханаа́н чурттуг херээженге өгленме. Харранда Вафуил кырган-ачаңның бажыңынче чорувут. Ооң Лаван деп оглунуң бир кыс уруунга өгленип ал’.

Иа́ков ачазын дыңнааш, ырак Харранда төрелдеринче ол дораан чорупкан.