Vhatukana vhavhili hafha vho fhambana zwihulu, a si zwone? Ni a ḓivha madzina avho? Muzwimi ndi Esau, nahone mutukana a khou lisaho nngu ndi Yakobo.

Esau na Yakobo vho vha vhe mafhaṱa a Isaka na Rebeka. Khotsi, Isaka, o vha a tshi funesa Esau, ngauri o vha e muzwimi wavhuḓi a tshi ḓisa zwiḽiwa hayani uri muṱa u ḽe. Fhedzi Rebeka o vha a tshi funesa Yakobo, ngauri o vha e mutukana o fhumulaho, a re na mulalo.

Makhulu Abrahamu o vha a kha ḓi tshila, nahone ri nga tou humbulela uri Yakobo o vha a tshi funa hani u mu thetshelesa a tshi amba nga ha Yehova. Abrahamu a fa e na miṅwaha ya 175, musi mafhaṱa a na miṅwaha ya 15.

Musi Esau e na miṅwaha ya 40 a vhinga vhasadzi vhavhili Kanana. Izwi zwa ṱungufhadza Isaka na Rebeka, ngauri avha vhasadzi vho vha vha sa rabeli Yehova.

Ḽiṅwe ḓuvha ha itea tshiṅwe tshithu tshe tsha ita uri Esau a sinyutshele murathu wawe Yakobo. Ha ḓa tshifhinga tsha musi Isaka a tshi ṱoḓou fha murwa wawe muhulwane phaṱhutshedzo. Esau a lindela u wana phaṱhutshedzo iyi ngauri o vha e muhulwane. Fhedzi Esau o vha o no ḓi rengisela Yakobo ndugelo ya u ṱanganedza phaṱhutshedzo. Hafhu, musi vhatukana vha tshi bebwa Mudzimu o vha o ri Yakobo u ḓo ṱanganedza phaṱhutshedzo. Zwa itea ngauralo. Isaka a fha Yakobo phaṱhutshedzo

Nga murahu, musi Esau a tshi zwi pfa a sinyutshela Yakobo. O vha o sinyuwa lwe a ri u ḓo vhulaha Yakobo. Musi Rebeka a tshi zwi pfa, a vhudza munna wawe Isaka: ‘Zwi ḓo vhifha arali Yakobo na ene a vhinga muṅwe wa havha vhasadzi vha Kanana.’

Isaka a vhidza murwa wawe Yakobo a mu vhudza: Ù songo vhinga musadzi wa Kanana. I ya nḓuni ya mukhulu wau Bethuele hangei Harani. U vhinge muṅwe wa vhananyana vha murwa wawe Labani.’

Yakobo a thetshelesa khotsi awe, a mbo ḓi fara lwendo lwawe lulapfu lwa u ya ha mashaka awe Harani

Genesi 25:5-11, 20-34; 26:34, 35; 27:1-46; 28:1-5; Vha-Heberu 12:16, 17.