MAGKAIBA gud an duha nga bata dinhi, diri ba? Maaram ka ba han ira ngaran? An parapanakop hin mga hayop amo hi Esaw, ngan an paramangno han karnero amo hi Jakob.

Hira Esaw ngan Jakob magkaruha nga anak nira Isaak ngan Rebeka. Hinigugma gud hi Esaw han iya tatay nga hi Isaak tungod kay maopay hiya manakop hin mga hayop ngan nagdadara hin pagkaon para ha pamilya. Kondi mas hinigugma ni Rebeka hi Jakob tungod kay mahilom ngan buotan hiya.

Buhi pa an ira lolo nga hi Abraham, ngan mahuhunahuna naton nga naruruyag gud mamati ha iya hi Jakob samtang nag-iistorya hiya mahitungod kan Jehova. Namatay hi Abraham ha edad nga 175, han 15 anyos an magkaruha.

Han 40 anyos hi Esaw, nag-asawa hiya hin duha nga Kanaanita. Salit nasubo gud hira Isaak ngan Rebeka tungod kay diri nagsisingba kan Jehova ini nga kababayin-an.

Usa ka adlaw, may-ada nahitabo nga nakaaghat gud kan Esaw nga masina ha iya bugto nga hi Jakob. Inabot na an panahon nga kinahanglan bendisyonan ni Isaak an iya suhag. Tungod kay magurang hi Esaw kan Jakob, naglalaom hi Esaw nga hiya an makarawat hini nga bendisyon. Kondi antes hito, iginbaligya na ni Esaw kan Jakob an iya katungod ha pagkarawat hito. Dugang pa, han natawo an magkaruha, nagsiring an Dios nga hi Jakob an makarawat han bendisyon. Ngan ito an nahitabo. Ginbendisyonan ni Isaak an iya anak nga hi Jakob.

Han hinbaroan ini ni Esaw, nasina hiya kan Jakob. Duro an iya kasina salit nakasiring hiya nga papatayon niya hi Jakob. Nabaraka gud hi Rebeka han hinbaroan niya ini. Salit ginsidngan niya an iya bana nga hi Isaak: ‘Makasurubo gud kon mag-aasawa liwat hi Jakob hin Kanaanita.’

Tungod hito, gintawag ni Isaak an iya anak nga hi Jakob ngan ginsidngan hiya: ‘Ayaw pag-asawa hin Kanaanita. Kadto lugod ha imo lolo nga hi Betuel ha Haran. Pangasaw-a an usa han mga anak nga babaye han iya anak nga hi Laban.’

Namati hi Jakob ha iya tatay, ngan nagbyahe dayon ngadto ha iya mga paryente ha Haran.