ACANDA ŵali apanoŵa ali ŵakulekangana mnope, ngati m’yoyo? Ana akwamanyilila mena gawo? Jwakusakula yinyamajo ali Esawu, soni kamcanda kakakucinga ngondoloko kali Yakobo.

Esawu ni Yakobo ŵaliji ŵanace ŵamaŵila ŵa Isaki ni Labeka. Atati ŵawo, Isaki, ŵamnonyelaga mnope Esawu ligongo ŵaliji jwakombola mnope kusakula yinyama ni ŵayikaga ni mboga pamlango syaŵalyaga wosope muliŵasalyo. Nambo Labeka ŵamnonyelaga mnope Yakobo, ligongo ŵaliji jwakutulala ni jwamtunjelele.

Abulahamu anganga ŵa acandaŵa ŵaliji cijumi, komboleka kuti Yakobo ŵanonyelaga kwapikanila paŵaŵecetaga ya Yehofa. Abulahamu ŵawile ali akwete yaka 175, pandaŵiji ŵanace ŵamaŵilaŵa ŵaliji ali akwete yaka 15.

Esawu paŵakwete yaka 40 ŵalombele acakongwe ŵaŵili ŵa cilambo ca Kanani. Yeleyi yamsakalisye mnope Isaki ni Labeka, ligongo acakongweŵa nganalambilaga Yehofa.

Lisiku line catendekwe cindu cicamtendekasisye Esawu kumtumbilila mnope Yakobo mpwakwe. Jakwanile ndaŵi jakuti Isaki ampe majali mwanagwe jwamkulungwa. Pakuŵa Esawu ŵaliji jwamkulungwa kwa Yakobo, jwalakwe ni juŵajembeceyaga kupocela majaligo. Nambo Esawu ŵaliji ali asumisye kala kwa Yakobo kuŵajilwa kwakwe kwakupocela majaligo. Nambosoni, mkanapagwe ŵanacewo Mlungu ŵasasile kuti Yakobo ni jucacipocela majaligo. Yeleyi ni yayatendekwe kwene. Isaki ŵapelece majali gala kwa Yakobo.

Kaneko, Esawu paŵagambile kumanyilila kuti majali gala gapite kwa Yakobo jwalakwe ŵamtumbilile mpwakwejo. Ŵatumbile mnope mwati ŵasasile kuti cam’wulaje Yakobo. Labeka paŵapikene yeleyi, ŵadandawile mnope. Ni ŵamsalile Isaki ŵamkwakwe kuti: ‘Naga Yakobo akulombelasoni jwamkongwe jwa ku Kanani, umi wangu cuwuŵe wakutesya canasa.’

Pelepo Isaki ŵam’ŵilasile Yakobo mwanagwe nikumsalila kuti: ‘Mkalombela jwamkongwe jwa ku Kanani kuno, mjawule kunyumba ja anganga ŵenu Betuwelo ku Halani. Mkalombele jumo mwa ŵanace ŵacakongwe ŵa Labani.

Yakobo ŵapikanile maloŵe ga atati ŵakwewo, ni ndaŵi jijojo ŵanyakwice ulendo wawulewu kwawula kwa acanasi ŵakwe ŵaŵatamaga ku Halani.