LE KAʼ ATÚUL paalal ka wilkoʼobaʼ jelaʼantakoʼob, ¿máasaʼ? ¿A wojel wa bix u kʼaabaʼob? Le ku tsʼoonoʼ Esaú, le ku kanan tamanoʼ Jacob.

Esaú yéetel Jacobeʼ j-iichoʼob, u taataʼobeʼ Isaac yéetel Rebeca. Isaaqueʼ u maas yaabilma Esaú, tumen jach u yojel tsʼoon yéetel ku taasik baʼal u jaantoʼob. Baʼaleʼ, Rebecaeʼ u maas yaabilma Jacob, tumen letiʼeʼ utúul paal jach ku yuʼubik tʼaan.

Teʼ kʼiinoʼob jeʼeloʼ, Abrahameʼ láayliʼ kuxaʼaneʼ. Jeʼel u páajtal k-tuklik bukaʼaj wal jatsʼutsil u yuʼubik Jacob u tsikbal u abuelo tiʼ Jéeobaeʼ. Abrahameʼ 175 jaʼaboʼob yantiʼ ka kíimi; le ka kíimeʼ, le j-iichoʼoboʼ tsʼoʼok u yantal 15 jaʼab tiʼob.

Cuarenta jaʼab yaan tiʼ Esaú ka tsʼoʼok u beel yéetel kaʼatúul x-canaaneaʼob. Lelaʼ tu beetaj u jach okʼom óoltal Isaac yéetel Rebeca, tumen le koʼoleloʼobaʼ maʼatech u meyajtkoʼob Jéeoba.

Upʼéel u kʼiinileʼ, úuch upʼéel baʼal beet u jach kʼuuxil Esaú yéetel Jacob, u yíitsʼin. Kʼuch u kʼiinil u tsʼáaik Isaac upʼéel kiʼikiʼ tʼaan tiʼ u yáax paal. Esaueʼ táan kaʼach u páaʼtik u kʼamik le kiʼikiʼ tʼaanoʼ, tumen letiʼeʼ sukuʼuntsil tiʼ Jacob. Baʼaleʼ, Esaueʼ u konmaj tiʼ Jacob u páajtalil u kʼamik le kiʼikiʼ tʼaanoʼ. Ku tsʼoʼokol xaneʼ, ka síij le kaʼatúul xiʼipalaloʼobaʼ, Dioseʼ tiaʼalaj Jacob kun kʼamik le kiʼikiʼ tʼaanoʼ. Bey úuchikoʼ. Isaaqueʼ tu tsʼáaj le kiʼikiʼ tʼaan tiʼ Jacoboʼ.

Le ka tu yojéeltaj Esaú lelaʼ, kʼuuxilnaj yéetel Jacob. Jach kʼuuxilnajaʼaneʼ ka tiaʼaleʼ yaan u kíimsik Jacob. Le ka tu yojéeltaj Rebeca lelaʼ, jach péekna u yóol. Le oʼolal tiaʼalaj tiʼ Isaac: Wa ka tsʼoʼokok u beel xan Jacob yéetel utúul x-canaaneaeʼ, jach yaan k-muʼyaj.

Isaac túuneʼ tu tʼanaj Jacob u paaleʼ ka tiaʼalajtiʼ: Maʼ u tsʼoʼokol a beel yéetel utúul x-canaanea. Maas maʼalob ka xiʼikech tu kaajil Arán tu yotoch a abuelo Betuel. Teʼeloʼ tsʼoʼokok a beel yéetel utúul u x-chʼupul paal Labán.

Jacobeʼ tu yuʼubaj u tʼaan u taata. Tu séebaʼanil túuneʼ tu káajsaj u bin tu náanach kaajil Arán, teʼ tuʼux kajaʼan kaʼach u láakʼoʼoboʼ.