?AMUN si sran nga Zakɔbu nin be su ijɔ lɛ’n? Kɛ Zakɔbu ɔli lele’n, yɛ ɔ nin be yiali nun gbo kun wun lɛ ɔ. Be su kankan be bua mun yɛ Zakɔbu usali be kɛ: ‘?Amun fin e sɛ?’

Be waan: ‘E fin Aran.’

Zakɔbu usali be kɛ: ‘?Amun si Laban?’

Be waan: ‘Ɛɛn, e si i. Nian, i wa Rasɛli bɔbɔ yɛ ɔ nin i nnɛn’m bé bá lɔ lɛ ɔ.’ ?Desɛn’n su lɛ’n, amun wun Rasɛli m’ɔ nin i bua’m bé bá lɔ’n?

Kɛ Zakɔbu wunnin i nin i niaan bian Laban wa bla Rasɛli nin i si i nnɛn mun’n, ɔ ɔli ko kondoli gbo’n su yɛbuɛ’n naan nnɛn’m b’a kwla nɔn nzue. Yɛ Zakɔbu tɔli Rasɛli nun naan w’a yi i wun nglo w’a kle i. Rasɛli i wun bliblili i kpa naan w’a wanndi w’a ko kan kle i si Laban.

Zakɔbu i sikelɛ m’ɔ sikeli Laban i awlo lɔ’n ti, ɔ yoli Laban fɛ kpa. Kpɛkun kɛ Zakɔbu seli kɛ ɔ klo kɛ ɔ́ já Rasɛli’n, ɔ yoli Laban fɛ ekun. Sanngɛ ɔ seli Zakɔbu kɛ ɔ di Rasɛli i ti junman afuɛ nso. Kɛ mɔɔ Zakɔbu klo Rasɛli dan’n ti, ɔ dili junman sɔ’n. ?Sanngɛ bla’n i jalɛ cɛn’n nun’n, amun si sa nga ɔ juli’n?

Laban fɛli i wa bla kpɛnngbɛn’n Lea fa sieli i Rasɛli i osu mannin Zakɔbu. Kɛ Zakɔbu kplinnin su kɛ ɔ́ dí junman afuɛ nso ekun mán Laban ti’n, Laban kusu fali Rasɛli fa mɛnnin i kɛ ɔ jɛ i. Blɛ sɔ nun’n Ɲanmiɛn buman sran nga be ja bla kpanngban’n be fɔ. Sanngɛ siɛn’n, Biblu’n se kɛ bla kunngba cɛ yɛ ɔ fata kɛ yasua kun jɛ i ɔ.