ARAM mo kun sairisay ining kaulay ni Jacob? Pagkatapos nin dakul na aldaw na pagbaklay, natagbuan sinda ni Jacob sa may bubon. Pigpapasturan ninda su mga karnero ninda. Naghapot si Jacob: ‘Taga sain tabi kamo?’

‘Taga Haran,’ an sabi ninda.

‘Bisto nindo si Laban?’ an hapot ni Jacob.

‘Iyo,’ an simbag ninda. ‘Uto o, padigdi an aki niyang si Raquel kaiba su mga karnero ni Laban.’ Nahihiling mo si Raquel sa ritrato?

Kan mahiling ni Jacob si Raquel, pinaligid niya su gapo na nasa ibabaw kan bubon ’nganing makainom an mga karnero. Hinadukan ni Jacob si Raquel saka nagpamidbid siya. Nasurpresa si Raquel kaya dali-dali siyang nag-uli para sabihon ini sa saiyang ama na si Laban.

Ugmahon si Laban na padaguson sainda si Jacob. Kan magsabi si Jacob na gusto niyang magin agom si Raquel, nagustuhan ini ni Laban. Pero, pinatrabaho nguna niya saiya si Jacob nin pitong taon para ki Raquel. Palibhasa muuton si Jacob ki Raquel, nag-uyon siya. Pero kan ikakasal na sinda, aram mo kun anong nangyari?

An itinao ni Laban ki Jacob iyo an matuang aki niyang si Lea imbes na si Raquel. Kan mag-uyon si Jacob na magtrabaho ki Laban nin pito pang taon, itinao man kaini si Raquel na magin agom niya. Kaidto, pigtutugutan nin Diyos an mga lalaki na magkaigwa nin labi sa sarong agom. Pero ngunyan, arog kan sabi sa Bibliya, an lalaki dapat na saro lang an agom.