Maana 18nan

Yakuba taara Karan

YAKUBA bɛ ka kuma cɛ minnu fɛ, i bɛ olu dɔn wa? Yakuba ye tile caman kɛ taama na. A nana se sisan kɔlɔnda dɔ la. A ye nin cɛw ye minnu tun bɛ ka u ka sagaw kɔlɔsi. Yakuba ye u ɲininka ko: ‘Aw bɛ bɔ min?’

U y’a jaabi ko: ‘Karan.’

Yakuba ko: ‘Yala aw bɛ Laban dɔn wa?’

U y’a jaabi ko: ‘Ɔwɔ. A denmuso Rasɛl natɔ filɛ ni a ka sagaw ye.’ Yala i ɲɛ bɛ Rasɛl natɔ la wa?

Yakuba ye Rasɛl ye tuma min na, ka a bɛnkɛ Laban ka sagaw fana ye Rasɛl kɔ, a taara kabakurun kolonkolon ka bɔ kɔlɔnda la, walisa sagaw ka se k’u min. O kɔfɛ, Yakuba ye Rasɛl da susu, k’a fɔ a ye ko ale ye Rasɛl tɛnɛmuso den de ye. O diyara Rasɛl ye kosɛbɛ. A bolila ka taa so ka o fɔ a fa ye, n’o ye Laban ye.

Yakuba tora Laban fɛ minkɛ, o diyara Laban ye kosɛbɛ. Tuma min na Yakuba  y’a fɔ Laban ye ko ale b’a fɛ ka Rasɛl furu, o diyara Laban ye. Nka, Laban y’a fɔ Yakuba ye ko ni a b’a fɛ ka Rasɛl sɔrɔ, fo a ka baara kɛ ale ye san wolonwula kɔnɔ. Ikomi Yakuba tun bɛ Rasɛl fɛ kosɛbɛ, a sɔnna o ma. Nka, i b’a dɔn min kɛra kɔɲɔ don na wa?

Laban ye a denmuso kɔrɔbalen Lea de di Yakuba ma. Yakuba sɔnna ka baara kɛ Laban ye san wolonwula wɛrɛ kɔnɔ minkɛ, Laban sɔnna ka Rasɛl fana di a ma. O waati la, Ala y’a to cɛw ka muso caman ta. Nka sisan, Bibulu b’a jira ko cɛ ka kan ka muso kelenpe dɔrɔn de ta.

Jenɛse 29:​1-30.