UNANYINGIKA atu aka awa anahanjika ni Yakomba? Muze te halinga wenyi wa matangwa anji, Yakomba yaliwana ni atu jacho ha shima lia meya. Te akwa kufunga mapanga. Yakomba yaahula ngwenyi: ‘Kumahenu kuli?’

Ayo yakumbulula ngwo: ‘Ku Harane.’

Yakomba yaahula nawa ngwenyi: ‘Nunanyingika Lapane?’

Ayo yakumbulula ngwo, ‘Ewa, tala mwanenyi wa pwo, Rakele, kaneza ni mapanga.’ Yena muhasa kumona Rakele chize aneza?

Muze Yakomba hamona Rakele kaneza ni mapanga ja natu, Lapane, iye yachiza liwe helu lia shima lia meya, hanga mapanga ahase kunwa meya. Hohene, Yakomba yambejala Rakele nawa yamulweza kuze iye anakatuka. Rakele yawahilila chinji, nawa iye yafuna ku zuwo hanga alweze tato Lapane.

Lapane yazanga chinji kutwama ni Yakomba. Kashika muze Yakomba etele Rakele hanga amumbate, Lapane yawahilila chinji. Alioze, Lapane yeta kuli Yakomba hanga akalakale miaka shimbiali mu minda yenyi, mba amwehe Rakele. Yakomba yatayiza, mumu te kakuzanga chinji Rakele. Alioze, muze mashimbu a umbachiso ahetele, yena unanyingika yize yinakapwako?

Lapane yahana kuli Yakomba mwanenyi mutangu, Liya, hi Rakele ko. Muze Yakomba atayijile kukalakalila nawa cheka Lapane ha miaka shimbiali, mba iye yamwaha Rakele hanga apwe mukwo-pwo. Ha mashimbu jacho, Zambi te kakwecha hanga malunga apwe ni mapwo aali chipwe anji. Alioze, musono ka, mumu Mbimbiliya yinasolola ngwo lunga ndo apwe ni pwo umuwika.