MA NAKAANAW anihebʼ li winq wankebʼ rikʼin laj Jacob? Ak yook chi wulak laj Jacob saʼ li tenamit Haran. Naq ebʼ li winq aʼin yookebʼ xkʼaakʼalenkil ebʼ li xkarneer chixkʼatq jun li bʼekbʼil haʼ. Tojaʼ naq laj Jacob kixye rehebʼ: ‹Bʼar nekexchalk?›

‹Laaʼo aj Haran› chankebʼ.

Kixye laj Jacob: ‹Ma nekeenaw ru laj Laban?›

Ebʼ li winq keʼxye: ‹Naqanaw ru. Chaawil yook chaq chi chalk li xrabʼin laj Laban rikʼinebʼ li xkarneer›. Ma nakaawil li xRaquel saʼ li eetalil?

Naq laj Jacob kiril ru li xRaquel, kirisi chaq li pek saʼ xbʼeen xjulel li haʼ re naq teʼukʼaq ebʼ li xkarneer. Laj Jacob kixtzʼubʼ ru xRaquel ut kixye re naq aʼan xkomon. Kisahoʼk saʼ xchʼool li xRaquel ut kixye chaq re li xyuwaʼ li kixkʼul.

Laj Laban sa saʼ xchʼool naq laj Jacob kikanaak saʼ rochoch. Naq laj Jacob kixye naq traj sumlaak rikʼin xRaquel, laj Laban kisahoʼk saʼ xchʼool. Laj Laban kixye re laj Jacob naq tkʼanjelaq rikʼin wuqubʼ chihabʼ, re naq tsumlaaq rikʼin li xRaquel. Laj Jacob kixkʼulubʼa aʼin, xbʼaan naq naxra li xRaquel chi anchal xchʼool. Naq kiwulak xkutankil xsumlajikebʼ, ma nakaanaw kʼaru kixbʼaanu laj Laban?

Laj Laban kixsumubʼ li xLea rikʼin laj Jacob choʼq reqaj li xRaquel. Li xLea asbʼej chiru xRaquel. Naq laj Jacob kixsume kʼanjelak wuqubʼ chihabʼ chik rikʼin laj Laban, kikʼeheʼk ajwiʼ xRaquel choʼq rixaqil. Saʼebʼ li kutan aʼin li Yos kixkanabʼ naq ebʼ li winq teʼxbʼaanu aʼin. Abʼan saʼebʼ li qakutan, li Santil Hu naxye naq ebʼ li winq tento naq teʼsumlaaq rikʼin jun ajwiʼ li ixq.