NG’OZEYE wantu awaya bemokenanga yo Yakobo? Vioka lumbu yayingi ya nkangalu andi o Yakobo wawanana yau vana sima kia maza. Mameme mau bavungulanga. O Yakobo wabayuvula: ‘Lu’esi kweyi?’

“Bavovele vo, tu esi Karani.”

Ubavovese vo, “Nga nuzeye o Labani?”

Oyau vo, ‘tunzeye. Tala, o Rakele wa mwan’andi ankento okwizanga yo mameme.’ Ng’omwene Rakele okwizanga?

O Yakobo vava kamwene Rakele yo mameme ma Labani wa ngw’andi ankazi, ofinamene, onengomwene etadi muna nu’a sima, onwikini mameme. O Yakobo ofibidi Rakele, uyisunzwidi. O Rakele ye kiese kiawonso wele samunwina o s’andi Labani.

O Labani wayangalala kikilu kala ye Yakobo. Wayangalala mpe vava Yakobo kalomba Rakele wa mwan’andi muna longo. Kansi, wanlomba vo kansadila mvu nsambwadi muna Rakele. Wau vo watoma zola Rakele Yakobo wansadila. Ng’ozeye dina diavangama vava kiafwana ntangw’a longo?

O Labani wavana Lea wa mwan’andi ambuta kwa Yakobo vana fulu kia Rakele. Vava Yakobo katambulwila sadila Labani e mvu nsambwadi miakaka i bosi, kamvana Rakele wa nkaz’andi. Muna lumbu yayina o Nzambi wayambulanga vo wantu basompa akento ayingi. Kansi, owau o Nkand’a Nzambi uvovanga vo o yakala ofwete kala yo nkento mosi kaka.