Icisimisisyo 18: Yakobi Aya ku Kalani
KANI ungabesiba aba balalume Yakobi alukulabila nabo? Panuma ya kwenda insiku isingi, Yakobi alibakumenye pa mukalo. Balukulame’mbelele syabo. Yakobi alibepwisye ati: ‘Muli bakwisa?’
Nabo ati: ‘Tuli baku Kalani.’
Alibepwisye Yakobi ati: ‘Kani mulimwisi Labani?’
‘Tulimwisi,’ nabo efi baasukile. ‘Lolesya, Laceli umwana wakwe aisa ne tanga lya mbelele sya bawisi.’ Kani wamubona Laceli ulya alukwisa akatalamukila palya?
Ili Yakobi abwene Laceli ali ne mbelele sya bamwinsyo wakwe ba Labani, alipalamine ne kwalamunapo ibwe ukulifumya pa kanwa ka mukalo ne kulitapila amenda itanga. Popele apo Yakobi alimufyontelepo Laceli ne kumubula ifi bali nakwe. Laceli alisangalele ukwakuti, kabili alile ku musi ne kubabula ba Labani bawisi.
Naye Labani alisangalele ukwakuti ati angekala na Yakobi. Pano ili Yakobi alombele ati ope Laceli, Labani alisangalele. Nangabe’fyo, Yakobi balimwebele ukulukupyunga mwi bala lyakwe Labani imyaka sisanu na sibili pakuti pa kuupa Laceli. Alipyungile’si myaka nipakuti Yakobi alimutemenwe Laceli. Pano ili mpindi yafikile iya kumuupa, kani ungesiba icacitikile?
Labani alipele Lea umwana wakwe umukulu kuli Yakobi pa mupunda wakwe Laceli. Ili Yakobi asumine ukupyungila Labani imyaka nasimbi sisanu na sibili, eli Labani amupele Laceli ukuba umukasi wakwe. Pali iilya mpindi baLesa balisuminisye ukuupa abakasi ukucila pali umo. Pano, ino mpindi Baibolo ilatubula ati umwalalume alyelelwe ukuba ne mukasi umo lukoso.
Ifyakutaŋga 29:1-30.
Ifyakwipusya
- Kani uyu moye ali pa cikope ninani, kabili findo Yakobi amucitiile?
- Findo Yakobi alipeelesye ukupyunga pakuti ope Laceli?
- Mba nindo Labani acitile ili impindi yafikile iyakweba’ti Yakobi ope Laceli?
- Mba cindo Yakobi asumine ukucita pakuti apinte Laceli ukubo’mukasi?
Ifyakwipusya na fimbi
- Pendeni Ifyakutaŋga 29:1-30.
Neli abepelwe kuli Labani, Yakobi alilangile syani umucinsi, kabili findo tungatuntululako nafwebo? (Taŋ. 25:27; 29:26-28; Mat. 5:37)
Icakubwenako cakwe Yakobi calilangile syani ubupusano buli pa kutemwa kwa cinenene eli ne kutemwa lukoso? (Taŋ. 29:18, 20, 30; Ulwimbo. 8:6)
Mba nibani abanakasi bane ababele ba mu ŋanda yakwe Yakobi kabili abamufyalile abana abalalume? (Taŋ. 29:23, 24, 28, 29)
