Yakova Mwaya kuHalane
Chihande 18
Yakova Mwaya kuHalane
UNAVEJIVA malunga anakushimutwila navo Yakova tahi? Yakova avawanyine halishima, omu atambukile makumbi amavulu. Vapwile nakufunga mikoko javo. Yakova avehwile ngwenyi: ‘Enu munafumu kulihi?’
Ngwavo, ‘Twafumu kuHalane.’
Yakova avehwile ngwenyi: ‘Munamutachikiza Lavane tahi?’
Vakumbulwile ngwavo: ‘Eyo. Tala mwanenyi wapwevo, Lakele ou mweza namikoko.’ Wamumono Lakele uze anakwiza kuze tahi?
Yakova hakumona Lakele namikoko vanatwenyi Lavane, ayile nakufumisa lilolwa kukanwa kalishima mangana mikoko vanwenga meya. Kaha Yakova amusweswenyele nakulijimbula kuli ikiye. Lakele awahililile, kaha ayile kwimbo nakulweza ise Lavane.
Lavane evwile kuwaha hakwiza chaYakova nakutwama nenyi. Lavane awahililile omu Yakova ehwile ngwenyi ambate Lakele. Oloze alwezele Yakova kuzata muwande myaka yitanu nayivali numba vamuhane Lakele. Yakova hakuzanga chikuma Lakele, alingile vene ngocho. Oloze unejiva chasolokele omu shimbu yakulimbata yahetele tahi?
Lavane amuhanyine Yakova mwanenyi wapwevo wamukulwane Leya, kushishisa muli Lakele. Yakova hakwitavila kumuzachila Lavane myaka yitanu nayivali cheka, Lavane amuhanyine nawa Lakele kupwa puwenyi. Mumakumbi aze, Kalunga etavishile vatu kumbata luhali. Oloze lelo, ngana muyasolola Mbimbiliya, lunga atela kupwa napwevo umwe kaha.