TAF min huma dawn l-​irġiel li qed ikellem Ġakobb? Wara li vvjaġġa għal ħafna ġranet, Ġakobb iltaqaʼ magħhom ħdejn bir. Kienu qed jieħdu ħsieb in-​nagħaġ tagħhom. Ġakobb staqsa: ‘Minn fejn intom?’

Huma qalu: ‘Minn Ħaran.’

Ġakobb staqsiehom: ‘Tafuh lil Laban?’

‘Iva,’ wiġbuh. ‘Ara, ġejja bintu, Rakele, mal-​merħla nagħaġ tiegħu.’ Qed taraha lil Rakele ġejja?

Meta Ġakobb ra lil Rakele bin-​nagħaġ taʼ zijuh Laban, hu mar u gerbeb il-​ġebla minn fuq il-​bir ħalli n-​nagħaġ ikunu jistgħu jixorbu. Imbagħad, Ġakobb ta bewsa lil Rakele u qalilha min kien. Kienet eċċitata ħafna, u marret id-​dar u qalet lil missierha Laban.

Laban kien ferħan ħafna li Ġakobb kien se joqgħod għandu. U meta Ġakobb staqsa biex jiżżewweġ lil Rakele, Laban ħa gost. Iżda, hu staqsa lil Ġakobb biex jaħdem fl-​għelieqi tiegħu għal sebaʼ snin biex jieħu lil Rakele. Ġakobb għamel dan għax kien iħobbha ħafna. Imma meta wasal iż-​żmien għaż-​żwieġ, taf x’ġara?

Laban ta lil Ġakobb lil bintu l-​kbira Lea minflok ma tah lil Rakele. Meta Ġakobb aċċetta li jaħdem għal Laban sebaʼ snin oħra, Laban tah ukoll lil Rakele bħala martu. F’dak iż-​żmien, Alla ħalla li raġel ikollu iktar minn mara waħda. Imma issa, bħalma turi l-​Bibbja, raġel għandu jkollu mara waħda biss.