¿Á XÍNI̱ÚN ndáana kúú na̱ káʼa̱n ta̱ Jacob xíʼin? Ku̱a̱ʼání ki̱vi̱ ni̱xi̱ka ta̱ Jacob saáví ni̱xa̱a̱ra nu̱ú ñúʼu na̱ ndáa ndikachi yu̱ʼu̱ pozo yóʼo. Ta̱ Jacob ni̱nda̱ka̱tu̱ʼunrana: ʼ¿Ndáa ñuu ke̱endó?ʼ

ʼÑuu Harán ke̱endi̱ʼ, káchina.

“¿Á xíni̱ndó ta̱ Labán?”, káchira.

“Xíni̱vandi̱ra”, káchina. ʼKoto chi yóʼo va̱xi ñá Raquel se̱ʼera ñá ndáa ndikachi sa̱na̱raʼ, káchina xíʼinra. ¿Á kivi kotoún ñá Raquel nu̱ú na̱ʼná yóʼo? Chi kúyatinñá va̱xiñá.

Tá xi̱ni ta̱ Jacob ñá Raquel va̱xiñá xíʼin ndikachi sa̱na̱ xitora ta̱ Labán, kama ni̱xa̱ʼa̱nra sa̱kútaʼara yu̱u̱ yu̱ʼu̱ pozo ña̱ va̱ʼa koʼorí ti̱kui̱í. Tasaá ta̱ Jacob chi̱ndéerañá ta ni̱ka̱ʼa̱nra xíʼinñá ndáana kúú na̱ veʼera. Ta ni̱kusi̱íní-iniñá tasaá ke̱eñá ku̱a̱ʼa̱nñá veʼeñá ta na̱túʼunñá xíʼin yiváñá ndiʼi ña̱ ku̱u.

Ta̱ Labán ni̱kusi̱íní-inira ña̱ ni̱ndo̱o ta̱ Jacob veʼera. Soo tá ni̱ka̱ʼa̱n ta̱ Jacob xíʼinra ña̱ kúni̱ra tindaʼa̱ra xíʼin ñá Raquel, ta̱ Labán ni̱kusi̱íní-inira ta ni̱ka̱ʼa̱nra xíʼinra ña̱ ná kachíñura nu̱úra u̱xa̱ ku̱i̱ya̱ xa̱ʼa ñá Raquel. Ta̱ Jacob ka̱chíñura xíʼin ta̱yóʼo chi xi̱kuni̱ra ñá Raquel. Soo tá ki̱xa̱a̱ ki̱vi̱ ña̱ tindaʼa̱na. ¿Á xíni̱ún ndáaña ku̱u?

Se̱ʼera ñá chéeva ta̱xira ndaʼa̱ ta Jacob ñá xi̱naní Lea, su̱ví ñá Raquel nítaxira ndaʼa̱ra. Tá ni̱ka̱ʼa̱n ta̱ Labán xíʼin ta̱ Jacob ña̱ kachíñura inka u̱xa̱ ku̱i̱ya̱ xíʼinra xa̱ʼa ñá Raquel, ta̱yóʼo ka̱ndíxavara. Tasaá ta̱ Labán ta̱xira ñá Raquel ña̱ tindaʼa̱ñá xíʼinra. Tá tiempo xi̱naʼá Ndióxi̱ xi̱taxivara ña̱ koo ku̱a̱ʼá ñá síʼína. Soo tiempo vitin, Tu̱ʼun Ndióxi̱ káʼa̱nña iinláva koo ñá síʼína.