Jacob yajki Harán
Tanojnots 18
Jacob yajki Harán
¿TIKMATI akonimej nejin takamej tein Jacob imiuan tajtojtok? Satepan keman ojtokak miak tonalmej, Jacob kinajsito ompakauin itech se ameyal kinpixtoyaj imin ichkauan. Jacob kintajtanij: ‘¿Kani nankayomej?’
Yejuan kijtojkej: ‘Tikayomej Harán’.
Jacob kintajtanij: ‘¿Nankixmatij Labán?’
Yejuan tanankilijkej: ‘Kemaj. Xikita, ne uitse Raquel, iichpoch Labán iuan ichkamej’. ¿Ueli tikita Raquel ualajtok?
Keman Jacob kiitak Raquel iuan ichkamej, kiajsito uan kijkuanilij tet tein ika tentsaktoya ameyal uan ijkon ueliskiaj atiskiaj ichkamej. Ompa, kipitsoj Raquel uan kiiluij akoni katka. Raquel moteluelitak, uan yajki ichan kitapouito ipopaj Labán nochi tein mochiuak.
Labán tel yolpakik keman Jacob mokauak ichan. Uan keman Jacob kiiluij ika kinekia monamiktis iuan Raquel, Labán moteluelitak. Sayoj ika kitajtanij Jacob maj tekitiskia iuan chikome xiuit uan ijkon kimakaskia Raquel. Jacob tekitik nejon xiujmej, porin kiteltasojtaya Raquel. Sayoj ika ijkuak ajsik tonal keman monamiktiskiaj, ¿tikmati toni mochiuak?
Labán kimakak iichpoch, Lea, tein tayekanaya, uan amo Raquel. Keman Jacob kijtoj ika tekitiskia iuan Labán okseki chikome xiuit, Labán no kimakak Raquel kemej inamik. Itech nejon tonalmej, Dios kinkauaya takamej maj monamiktikan imiuan miakej siuamej. Sayoj ika axkan, kemej kinextia Biblia, moneki kipiaskej sayoj se imin namik.
