Yakobo Okuza Harani
Ekitebyo 18
Yakobo Okuza Harani
NOOMANYA aba bashaija abu Yakobo arikugamba nabo? Bwanyima y’orugyendo rw’ebiro bingi, Yakobo akababugana aha iziba. Bakaba bariisize entaama zaabo. Yakobo yaababuuza ati: ‘Nimuruga hi?’
Bamugira bati: ‘Nituruga Harani.’
Yakobo yaababuuza ati: ‘Nimumanya Labaani?’
Bagarukamu bati: ‘Eego, nangwa reeba omuhara Rakeeli ariyo naija n’amasyo g’entaama ze.’ Nooreeba Rakeeli kuriya arikwija?
Yakobo ku yaareebire Rakeeli ari n’entaama za nyinarumi Labaani, yaagyenda yaakumbagaza eibaare kuruga aha iziba kugira ngu entaama zibaase kunywa. Bwanyima Yakobo yaanywegyera Rakeeli kandi yaamweyanjurira. Rakeeli yaashemererwa munonga, kandi yaaza omuka yaagambira ishe Labaani.
Labaani akashemererwa munonga okutuura na Yakobo. Kandi Yakobo ku yaashabire kushwera Rakeeli, Labaani yaashemererwa. Kwonka, yaashaba Yakobo kumukorera kumara emyaka mushanju ahabwa Rakeeli. Ahabw’okugira ngu akaba naakunda Rakeeli munonga, Yakobo akaikiriza kukora eki. Kwonka obwire bw’okuhingirwa ku bwahikire, noomanya ekyabaireho?
Labaani akaheereza Yakobo omuhara omukuru Lea omu mwanya gwa Rakeeli. Yakobo ku yaikiriize kugaruka kukorera Labaani endiijo myaka mushanju, Labaani nikwo kumuheereza Rakeeli okuba omukazi we. Omu bunaku obwo, Ruhanga akaba naikiriza abashaija kugira abakazi barikurenga ahari omwe. Kwonka hati, nk’oku Baibuli erikworeka, omushaija ashemereire kugira omukazi omwe wenka.
