WASWE, iu savve hu nao olketa man hia wea Jacob hem story witim? Bihaen hem gogo for plande day, Jacob meetim olketa klosap long wanfala well. Olketa lukaftarem olketa sheep. Jacob askem olketa: ‘Iufala kam from wea?’

Olketa sei: ‘Haʹran.’

Jacob hem askem olketa: ‘Waswe, iufala savve long Laʹban?’

Olketa sei: ‘Ia, lukim, dota bilong hem Rachel nao long there witim olketa sheep bilong hem.’ Waswe, iu savve lukim Rachel hem wakabaot kam?

Taem Jacob lukim Rachel witim olketa sheep bilong uncle bilong hem Laʹban, hem go and aotem ston from well mekem olketa sheep savve drink. Then Jacob kissim Rachel and talem hem hu nao hem. Rachel hapi tumas and hem go long haos and talem diswan long dadi bilong hem Laʹban.

Laʹban barava hapi for Jacob stap witim olketa. And hem hapi tu taem Jacob ask for maritim Rachel. Bat, hem askem Jacob for waka long field bilong hem for sevenfala year for Rachel. From hem barava lovem Rachel, Jacob hem duim diswan. Bat long taem bilong marit, iu savve wanem nao happen?

Laʹban givim firstfala dota bilong hem Leʹah for Jacob and no Rachel. Taem Jacob willing for waka for Laʹban for narafala seven year moa, Laʹban givim hem Rachel olsem waef bilong hem tu. Long datfala taem God letem olketa man for garem winim wanfala waef. Bat distaem, olsem Bible showimaot, man mas garem wanfala waef nomoa.