¿LA AWETAʼM e jachin täq we achijabʼ che tijan kechʼaw rukʼ Jacob? Chiʼ qʼaxnäq chi kebʼ oxibʼ qʼij che umajom ubʼe, ri Jacob xeril che unaqaj jun kʼwaʼ. Tijan kkechajej ri täq kichij. Ri Jacob xuta wariʼ chike: ‹¿Jachiʼ, o ni, kixpe wi?›

‹Pa ri Harán›, xechaʼ.

Xuta ri Jacob chike: ‹¿Iwetaʼm uwäch ri Labán?›

‹Jeʼ›, xechaʼ. ‹Chawilampeʼ, petinäq ri Raquel rukʼ ri jupuq uchij.› ¿La kawil wariʼ at?

Chiʼ ri Jacob xril ri Raquel rekʼam ri täq chij rech Labán, xbʼe che uresaxik ri abʼäj kʼo puwiʼ ri kʼwaʼ rech ri täq chij kketij ri jaʼ. Tekʼuriʼ ri Jacob xuya jun rutzil uwäch ri Raquel xuqujeʼ xubʼij che jachin laʼ. Ri Raquel sibʼalaj xkikotik, xbʼe che rachoch tekʼuriʼ xubʼij che ri utat Labán su xbʼantajik.

Ri Labán sibʼalaj xkikotik rumal che ri Jacob xkanaj kan pa rachoch. Chiʼ ri Jacob xubʼij che ri Labán che kraj kkʼuleʼ rukʼ ri umiʼal, ri Labán xkikotik. Tekʼuriʼ xuta che ri Jacob che kchakun wuqubʼ junabʼ rukʼ (7 años) rech kuya Raquel che. Jacob xubʼan wariʼ rumal che sibʼalaj kraj ri Raquel. Chiʼ xopan ri qʼij che ri kʼulanem, ¿la awetaʼm su xbʼantajik?

Ri Labán xuya ta ri Raquel che, are xuya ri nabʼeʼal umiʼal che, ubʼiʼ Lea. Rumal wariʼ, ri Jacob rajawaxik xchakun wuqubʼ junabʼ chik rukʼ ri Labán, rech we achi riʼ xuya ri Raquel che ri Jacob rech kubʼan rixoqil che. Ojer ri Ajawaxel kʼot kubʼij chike ri achijabʼ che kʼo kʼi täq kixoqil. Kimik kubʼij ri Loqʼalaj Pixabʼ che rajawaxik che xiw jun kixoqil kʼolik.