Tantara 18

Nandeha Ta-Harana ane Jakoba

HAINAO va hoe ia lahilahy iresàhan’i Jakoba reo? Laha fa baka nandeha tanaty andro maromaro Jakoba, le nifankahita tamin-droze reo tamy vovo raike zay. Nikarakara ty aondrin-droze, roze. Nanontany Jakoba hoe: ‘Baka aìa nareo?’

‘Baka Harana any’, hoy ty asan-droze.

Nanontany Jakoba hoe: ‘Hainareo va Labana?’

‘Eka’, hoy ty asan-droze. ‘Ndroy ty anak’ampelane miarake ami’ty aondrine.’ Hitanao va Rahely mandeha bakao tiky?

Laha fa nihitan’i Jakoba Rahely niarake tamy aondrin’i Labana, dadatoane, le nalàne vato nilimboke vovo iny soa hahafàha aondry reo hinon-drano. Bakeo nanoroke an’i Rahely Jakoba sady nivòla tamine hoe ia ie. Faly bibike Rahely, ka nandeha an-trano ane mba hanambara raha io tamin’i Labana, babane.

Falifale bibike Labana laha fa nipetrake tamine tao Jakoba. Ka laha fa nangatake an’i Rahely mba ho valine Jakoba le nahafaly an’i Labana raha zay. Fe, mba hahazoa an’i Rahely le nangatake an’i Jakoba hiasa amine ao anaty fito tao Labana. Nitea an’i Rahely maré Jakoba ka nanòvine raha zay. Fe laha fa niavy ty fotoa tokone hanambaliane aze, hainao va hoe ino ty raha niseho?

Lea anak’ampelan’i Labana voalohane iny ro nameane an’i Jakoba, fa tsy Rahely. Ka laha naneky hiasa ho an’i Labana anaty fito tao ndraike Jakoba, le hamean’i Labana aze ho valine kea Rahely. Tamy fotoa io, le mbo nengà-Ndranahare hanambaly mihoatse ty raike ty lahilahy. Fe henany zao, arake ty hita amy Baiboly ao, le tokone hanambaly raike avao ty lahilahy.

Genesisy 29:1-30.