ИА́КОВ кым-биле чугаалажып турар-дыр, билир сен бе? Орукка үр чораан соонда, Иа́ков кудук чанынга бо кижилерге ужуражы берген. Олар хой кадарып турар. Иа́ков олардан айтырган: ‘Кайыын силер?’

— Харрандан бис,— деп, олар харыылаан.

— Лаванны билир силер бе?— деп, Иа́ков олардан айтырган.

— Билир бис,— дигеннер.— Көрем, ооң уруу Рахи́ль кодан хойлары-биле дуу кел чор.

Ыракта Рахи́льди көрүп тур сен бе?

Лаван деп даайының уруу Рахи́льди кодан хойлары-биле кел чыдарын Иа́ков көргеш, хойларны суггарар кылдыр кудуктан дашты чайладыпкан. Ооң соонда ол Рахи́льди чыттап кааш, бодун кым дээрзин чугаалаан. Девидеп-хөлзээн Рахи́ль бажыңынче баргаш, ачазы Лаванга шупту чүвени чугаалап берген.

Иа́ков ооң бажыңынга артар боорга, Лаван дыка өөрээн. Ынчангаш кажан Иа́ков Лавандан кадай кылдыр Рахи́льди дилээрге, ол база хөлчок өөрээн. Ынчалза-даа Рахи́ль дээш чеди чыл иштинде ооң шөлүнге ажылдаар кылдыр, Иа́ковту ол дилээн. Иа́ков Рахи́льге дыка ынак турган, ынчангаш чөпшээрешкен. Ынчалза-даа куда үези кээрге, чүү болганын билир сен бе?

Рахи́льдиң орнунга Лаван кадай кылдыр бодунуң улуг уруу Ли́яны берипкен. Ынчангаш кажан Иа́ков Лаванга ам-даа чеди чыл ажылдаарын чөпшээрежирге, Лаван аңаа кадай кылдыр Рахи́льди база берген. Ол үеде Бурган эр улуска элээн каш кадайлыг болурун чөпшээреп турган. Ынчалза-даа ам Библияның көргүзүп турары-биле алырга, эр кижи чүгле чаңгыс кадайлыг болур ужурлуг.