KILALA mo ba ini nga kalalakin-an nga kaistorya ni Jakob? Iginkita hira ni Jakob ha atabay katapos han iya pagbyahe hin damu ka adlaw. Ginmamangnoan nira an ira mga karnero. Hi Jakob nagpakiana: ‘Taga-diin kamo?’

‘Taga-Haran,’ siring nira.

‘Kilala ba niyo hi Laban?’ nagpakiana hi Jakob.

‘Oo,’ binaton hira. ‘Kitaa, tiabot an iya anak nga hi Rakel upod an kakarnerohan han iya tatay.’ Nakikita mo ba hi Rakel ha retrato?

Han nakita ni Jakob hi Rakel nga anak han iya batâ nga hi Laban, iya gin-abrihan an atabay basi makainom an mga karnero. Katapos, ginhadkan ni Jakob hi Rakel ngan nagpakilala hiya. Nalipay gud hi Rakel, ngan inuli dayon hiya basi sumatan an iya tatay nga hi Laban.

Kinasingkasing nga ginpaukoy ni Laban ha ira hi Jakob. Ngan han naghangyo hi Jakob nga magin asawa hi Rakel, tinugot hi Laban. Kondi, ginhangyo niya hi Jakob nga magtrabaho ha iya uma hin pito ka tuig para kan Rakel. Tungod kay hinigugma gud ni Jakob hi Rakel, ginbuhat niya ito. Kondi ha adlaw han kasal, may-ada nahitabo. Maaram ka ba kon ano?

Iginhatag ni Laban kan Jakob an iya suhag nga hi Lea imbes nga hi Rakel. Kondi, han inuyon hi Jakob nga magtrabaho kan Laban hin pito pa ka tuig, iginhatag liwat ha iya hi Rakel sugad nga iya asawa. Hadto gintutugotan han Dios an lalaki nga magkaada hin sobra usa nga asawa. Kondi yana, sugad han mababasa ha Biblia, kinahanglan usa la an asawa han usa nga lalaki.