Tantara 18

Jakoba Ta Harana

MBA hainao olo aby ikoran̈an’i Jakoba io? Jakoba koa fa nandeha, fanôjy irô io marikitry vôvo. Irô io mpiambin̈y ôndrikôndriky. Jakoba nan̈ontany irô: ‘Anarô mipetraka aia?’

‘Harana’, volan̈in-drô.

‘Hainarô ma Labana?’, hoy Jakoba tamin-drô.

‘Ia, hainay’, volan̈in-drô. ‘Indriô, zanany man̈angy edy navy rỳ, miaraka ôndrikôndrikinany. Rahely an̈arany.’ Hitanao Rahely avy miaraka ôndrikôndriky rỳ?

Jakoba koa fa nahita Rahely miaraka ôndrikôndrikin’i Labana zamany, natekiny vato tan̈abon’ny vôvo tiô, beky ôndrikôndriky aby io tsy sahiran̈a migiaka. Koa fa vita zen̈y, nirôfin’i Jakoba Rahely, baka iô nivolan̈iny taminany azôvy izy. Endrakendraka Rahely, ke lôso nitantara tamy babany.

Labana ravoravo naharen̈y Jakoba hidôko amin-drô ao. Jakoba koa fa nangataka Rahely ataony vady, Labana nahairavoravo fo. Izy fo nivolan̈a tamy Jakoba fa mila miasa aminany fito taon̈o antsendriky, vo mahazo Rahely. Nan̈eky Jakoba, fôtony tiany mare Rahely. Koa fa navy amy zay lera tôkony han̈anaovan̈a mariazy, hainao ino raha niboaka?

Tsy Rahely namian’i Labana Jakoba fa Lea, zôkin’i Rahely. Jakoba koa fa nan̈eky hiasa taminany fito taon̈o ndreky, Labana nan̈amia izy Rahely. Tamy zen̈y, Zan̈ahary mbala nan̈aomba lelahy hanambady maro. Amin’andra ziôty, Baiboly mivolan̈a fa, man̈angy araiky fo tôkony vadin’ny lelahy araiky.

Genesisy 29:1-30.