ANA akwamanyilila ŵandu ŵakuŵecetana ni Yakobowo? Yakobo ali ajesile kwa masiku gejinji, ŵasimene ni jemanjaji pacisima. Ŵaliji mkusamalila ngondolo syawo. Yakobo ŵawusisye kuti: ‘Ana kumangwawo kwapi?’

Jemanjaji ŵajanjile kuti: ‘Ku Halani.’

Yakobo ŵawusisye kuti: ‘Ana akummanyilila Labani?’

Ŵajanjile kuti: ‘Elo. Alole, Lakelo mwanagwawo jwamkongwe ni jwakwisa akojo, ni ngondolo sya atatigwe.’ Ana akum’wona Lakelo ali mkwisa capalutandopo?

Yakobo paŵam’weni Lakelo ali ni ngondolo sya ce Labani, mjomba ŵa Yakobo, ŵapite pacisima pala ni kututila pambali liganga lya pacisimapo kuti ngondolo simwe mesi. Kaneko Yakobo ŵamkomasisye Lakelo palijeje ni ngomo, ni kulimanyisya kwa Lakelojo. Lakelo ŵasangalele mnope, ni ŵapite kunyumba kukwasalila ce Labani babagwe.

Labani ŵasangalele mnope kuti atameje yimpepe ni Yakobo. Soni Yakobo paŵaŵendile kuti alombele Lakelo, Labani ŵasangalele. Nambope, ŵam’ŵendile Yakobo kuti amkamulile kaje masengo kwa yaka msano ni yiŵili mkanamlombe Lakelo. Ligongo lyakuti ŵamnonyelaga mnope Lakelo, Yakobo ŵakamwile masengogo. Nambo sambano pajakwanile ndaŵi ja ulombela, ana akumanyilila yayatendekwe?

Labani ŵapelece kwa Yakobo Leya mwanagwe jwamkulungwa, mmalo mwa Lakelo. Yakobo paŵajiticisye kuti amkamulile masengo Labani yaka yine msano ni yiŵili, Labani ŵampelesoni Lakelo kuti aŵe ŵamkwakwe. Moŵa gelego, Mlungu ŵakundaga acalume kola acakongwe ŵakupunda jumo. Nambo sambano, Baibulo jikulosya kuti jwamlume akoleje jwamkongwe jumo basi.