¿NANLO chú layibu ni caniné cú Jacob la? Ma xidal dzú de goló casaa Jacob bidzel layibu gahxca roʼ toib pós. Layibu cayanyibu xiil, né Jacob gonabdiitz layibu: ¿De chú gudx lóoto?

De gudx Harán, cuapyibu.

¿Rimbuto Labán la? Gonabdiitz Jacob.

Rimbudo, cuapyibu. Bibiʼ, ca sieed xiindzapbu Raquel né guirá xilieen xtunybu. Looy, ¿labúu rabilo Raquel cabigax la?

Órni Jacob bibiʼ guirá xilieen xtuny bixiobu Labán ni sitné Raquel, goyebu né golébu guiee ni náaxh roʼ pós par labúu gueʼ guirá xilieen reʼ nís. Ór cú Jacob biduidy toib bixit Raquel né gochbu Raquel que bixiosbu laa Isaac né láabu ngú Jacob. Raquel nigolú bibaladx, goyeecabu lidxbu né gochbu bixiosbu Labán xí gosaclobu.

Labán bibaladx que Jacob ñaʼan riolidxbu. Labán bibaladx órni Jacob góoch láabu que nainy guicaʼbu Raquel. Per Labán gonab a Jacob que par labúu guicaʼbu Raquel napbu xi de gonybu dxiin ló xalioo Labán gatz íz. Jacob buny láani portín nigolú gondxibu Raquel. Per órni bidxin dzú par gotzñayibu, ¿nanlo xí góc la?

Labán diti biduidybu Raquel nacaʼ Jacob napli Lea xiin lagolbu biduidybu Jacob. Órni Jacob gosaguel gony dxiin gatz íz más né Labán, láabu láaca biduidybu Raquel xiindzapbu par guidxin gac tzeelbu. Dzúcu Dios raduidybu lagary que buñguieeu labúu gotzña né más de toib buñgonaʼ. Per ló xtzúno, xomod rasuidy la Biblia, buñguieeu non gony galtzeʼel né toibsi buñgonaʼ.