Maana 19nan

Yakuba ka denbaya ka bon

E KA nin denbayaba lajɛ. Yakuba denkɛ 12 don. Denmusow fana bɛ Yakuba bolo. I bɛ Yakuba den kelen-kelen bɛɛ tɔgɔ dɔn wa? An ka u dɔw tɔgɔ lajɛ ɲɔgɔn fɛ.

Lea ye Rubɛn, Simeɔn, Levi ani Juda wolo. Rasɛl y’a ye minkɛ ko a tɛ ka den sɔrɔ, a dusu kasira kosɛbɛ. O la sa, a y’a ka jɔnmuso Bilha di Yakuba ma. Bilha ye den fila sɔrɔ, Dan ani Nefitali. Lea fana y’a ka jɔnmuso Zilpa di Yakuba ma. Zilpa ye Gad ni Asɛr sɔrɔ. Kɔfɛ, Lea ye den fila wɛrɛw sɔrɔ, Isakar ni Zabulɔn.

A laban na, Rasɛl fana sera ka den sɔrɔ. A y’o tɔgɔ da ko Yusufu. An bɛna fɛn caman kalan Yusufu kan kɔfɛ, bawo a kɛra mɔgɔba ye. Yakuba ye o denkɛ 11 de sɔrɔ k’a to Rasɛl fa ka so.

Yakuba ye denmusow fana sɔrɔ, nka Bibulu bɛ kuma a denmuso kelenpe dɔrɔn de kan. O tun tɔgɔ ye ko Dina.

Yakuba y’a latigɛ ka segin Kanan waati min na, o sera. A y’a ka denbayaba ani a ka sagaw ani a ka misiw bɛɛ dalajɛ, ka taama jan daminɛ.

A bɛ waati dɔɔnin bɔ sisan Yakuba ni a ka denbaya bɛ Kanan jamana kɔnɔ. Nka, sani u ka se u seyɔrɔ la, Rasɛl ye denkɛ dɔ wɛrɛ sɔrɔ. Nka, Rasɛl ka tin gɛlɛyara kosɛbɛ, fo a jiginnen kɔ o den na, a sara. Nka fɛn fosi tun tɛ den na. Yakuba ye a tɔgɔ da ko Benjamɛn.

An ka an hakili to Yakuba denkɛ 12 tɔgɔw la, bawo Israɛl siya bɔra olu de la. Israɛl ka kabila 12 tɔgɔ dara Yakuba denkɛ 10 ani Yusufu denkɛ fila de la. Isaka ye san caman kɛ o denw wololen kɔfɛ. A nisɔndiyara ka a ye ko a ye mɔden caman sɔrɔ. Nka, fɛn min ye a mɔden Dina sɔrɔ, an ka o lajɛ sisan.

Jenɛse 29:​32-35; 30:​1-26; 35:​16-19; 37:⁠35.