Abahüdaguni 19

Óunwenbu lufamilia Hakobu

ARIHABEI óunwenbu familia le. Añahán duusu lirahüñü Hakobu wügüriña. Garahüñüti giñe würiña. Subuditi san hiri fiú hádangiñe lirahüñü bun? Wafurendeira fiú lídangiñe.

Aba tágurahani Lía Rubén, Simeón, Lewí luma Hudá. Dan le tarihín Rakeli luagu siñá lan tagaraüdün, aba tírudun. Ligía tíchugunbarun Bilá to tumusun lun Hakobu, ábati garahüñü tan Bilá biama, Dan luma Nefütalí híribei. Aba giñe tíchugunu Lía Silüpá to tumusun lun Hakobu, aba tágurahani Silüpá, Gadü luma Aserü. Lagumuhóun ábaya gasaanigu tan Lía biama, Isakárü luma Sabulón.

Lárigiñe, aba gayara lan gasaani tan Rakeli, aba tíchugun Hosé luagu. Wafurendeirubame saragu katei luagu Hosé, ladüga chülüti lun aban lan gürigia súdiniti. Añahán unsu lirahüñü Hakobu ha nasiruabaña dan meha le lawinwandunbei lúbiñe Lawán le túguchi Rakeli.

Garahüñüti meha giñe Hakobu fiú würiña, ani tirirügüñein aban hádangiñe tidan Bíbülia. Dina meha tíribei.

Aba lachülürün dan lun desidírü lan Hakobu lígiruni Lawán lun lagiribudun Kanán. Ligía lóundarunbalin óunwenbu lufamilia, bandi lilügüniñu mudún hama sun libiñanigu aba lagumeseruni lidise wéiyaasu ligía.

Fiú dan lárigiñe lagiribudun Hakobu hau lufamilia uburugun Kanán, dan le lidanñanu lubéi wéiyaasu aba gasaani tan Rakeli ábaya irahü, aba tounwen dan le tágurahanbei. Ánheinti irahü magadiñeti. Aba líchugun Hakobu Benhamín luagu.

Busentiwa waritaguni hiri duusu lirahüñü Hakobu ladüga hádangiñe lan hayabin sun néchanigu ísüraelina. Dúusugubei türibu ísüraelina barühamuti hiri diisi lirahüñü Hakobu hama biama lirahüñü Hosé. Wínwanti Isaakü saragu irumu lárigiñe nasirua hamá sun irahüñü ha, ani ma funa lugundan luagu gíbe hamá libaña. Gama lumoun ariha waméi le asuseredubei tun Dina to libari.

Agumesehani 29:32-35; 30:1-26; 35:16-19; 37:35.