Jakob u na eṱunḓu enene
EHUNGI 19
Jakob u na eṱunḓu enene
TARA keṱunḓu enene ndi. Imba ovazandu 12 vaJakob. Eye wina wa ri novakazona. Ove mo tjiwa omana ya kangamwa umwe wovanatje? Indjeye tu rihonge tjiva vawo.
Lea wa panduka Ruben, Simeon, Levi na Juda. Ragel tja muna kutja eye ka panduka, eye wa hihamwa omutima. Okutja wa yandja omukarere we omusuko wena Bilha ku Jakob, nu Bilha wa panduka ovazundu vevari womana Dan na Naftali. Okuzambo Lea wina wa yandja omukarere we omusuko Silpa ku Jakob, nu Silpa wa panduka Gad na Aser. Lea rukwao wa panduka ovazandu vevari, Isaskar na Sebulon.
Korusenina Ragel wa panduka omuatje. Eye we mu ruka Josef. Kombunda matu rihongo ovingi ohunga na Josef, mena rokutja eye wa karira omundu omunanḓengu tjinene. Imba va ri ovazandu 11 mbu va pandukirwa Jakob eye tja turire puna Laban ihe yaRagel.
Jakob wina wa ri novakazona, nungwari Ombeibela i tu pa ena ra umwe uriri. Ena re ra ri Dina.
Oruveze rwa tumbuka indu Jakob tja tya okuisa Laban nokuyaruka ku Kanaan. Okutja eye wa woronganisa eṱunḓu re enene notupanda otunene twozonḓu nozongombe neye wa uta ouyenda we oure.
Okaruveze okasupi kombunda ya indu Jakob neṱunḓu re tji va kotoka mu Kanaan, Ragel wa panduka omuatje warwe omuzandu. Ihi tja tjitwa ngunda ava ri mouyenda. Ragel wa ri nouzeu ounene neye wa ṱa ngunda ama panduka. Nungwari okazandona ka ri nawa. Jakob we ke ruka Benjamin.
Ngatu zemburuke omana yovazandu va Jakob 12 mena rokutja otjiwaṋa atjihe tjaIsrael tja za mu wo. Mouatjiri, omihoko 12 vyaIsrael vya rukirwa kovazandu 10 vaJakob na kovazandu vevari vaJosef. Isak wa hupa ozombura ozengi kombunda yovazandu mba avehe tji va kwatwa, nu ihi ngahino tje mu pa onyuṋe okukara novazandu wovazandu ve ovengi. Nungwari indjeye tu tare kutja pa tjitwa tjike komusuko womuzandu we Dina.
