TAQSIṬ TIS 19

Yeɛmeṛ wexxam n Yeɛqub

MUQEL tawacult-​agi tameqrant. Tnac n warrac-​agi d arraw n Yeɛqub. Lameɛna yesɛa ula ţ-​ţullas. Tessneḍ meṛṛa ismawen-​nsen? Tura a nwali kra seg-​sen.

Liya tesɛa-​d Rawubin, Cimɛun, Lewwi akk-​d Yahuda. Ma d Ṛaḥil, neţţat teḥzen aṭas imi ur d-​tesɛi ara dderya. Ihi tefka i Yeɛqub taqeddact-​is Bilha i d-​yesɛan sin warrac, Dan akk-​d Naftali. Umbeɛd Liya tefka ula d neţţat i Yeɛqub taqeddact-​is Zilfa i d-​yesɛan Gad akk-​d Acir. Liya tesɛa-​d daɣen sin warrac, Isasxaṛ akk-​d Zabulun.

Ɣer taggara Ṛaḥil tesɛa-​d aqcic. Tsemma-​yas Yusef. Ɣer zdat a nwali aṭas n leḥwayeǧ ɣef Yusef axaṭer yuɣal d argaz mechuṛen. D wigi i d 11 n warrac i s-​d-​ilulen i Yeɛqub asmi i gezdeɣ ɣer Laban, baba-​s n Ṛaḥil.

Yeɛqub yesɛa-​d daɣen kra n tullas, lameɛna Adlis Iqedsen yefka-​d kan isem n yiwet seg-​sent. Isem-​is Dina.

Yewweḍ-​ed wass anda yeqsed Yeɛqub ad yeǧǧ Laban akken ad yuɣal ɣer tmurt n Kanɛan. Ihi ijmeɛ-​ed tawacult-​is meṛṛa d lmal akk yesɛa, ama d lmal amecṭuḥ ama d lmal ameqran, dɣa yeṭṭef abrid iḍulen akken ad yuɣal ɣer tmurt-​is.

Yufa-​ten-​id lḥal kecmen tamurt n Kanɛan mi d-​tesɛa Ṛaḥil mmi-​s wis sin. Deg webrid i llan asmi i d-​yeḍra wannect-​a. M’akken i d-​terba, Ṛaḥil tesɛedda taswiɛt iweɛṛen i ţ-​issawḍen ɣer lmut. Ma d llufan-​nni i d-​ilulen ur t-​yuɣ wara. Yeɛqub isemma-​yas Binyamin.

Nebɣa a necfu ɣef yismawen n 12 n warrac n Yeɛqub axaṭer seg-​sen i d-​yekka wegdud n Isṛayil. Di tin n ṣṣeḥ, ismawen n tnac-​nni n leɛṛac n Isṛayil kkan-​d seg yismawen n ɛecṛa warrac n Yeɛqub d sin warrac n Yusef. Isḥaq iɛac aṭas n iseggasen mbeɛd talalit n warrac-​agi meṛṛa. Mebla ccekk yefṛeḥ aṭas imi i gesɛa annect-​a meṛṛa n warraw n warraw-​is. Tura a nwali acu i geḍran d Dina, yelli-​s n mmi-​s.

Laṣel n ddunit 29:32-35; 30:1-26; 35:16-19; 37:35.