TARORA famĩlĩ ĩno nene. Aya nĩo ariũ 12 a Jakubu. O na ningĩ aarĩ na airĩtu. Nĩ ũũĩ marĩĩtwa ma mwana o na ũmwe? Tareke twĩrute mamwe ma marĩĩtwa macio.

Lea aaciarire Reubeni, Simeoni, Lawii na Juda. Rĩrĩa Rakeli onire atĩ ndaragĩa ciana-rĩ, nĩanyitirũo nĩ kĩeha mũno. Kwoguo akĩhe Jakubu Biliha ndungata yake ya mũirĩtu, nake Biliha agĩkĩgĩa na ihĩĩ igĩrĩ, Dani na Nafitali. O nake Lea akĩhe Jakubu Zilipa ndungata yake ya mũirĩtu, nake Zilipa agĩciara Gadi na Asheri. Mũthia-inĩ Lea akĩgĩa na ihĩĩ ingĩ igĩrĩ, Isakaru na Zebuluni.

Marigĩrĩrio-inĩ, Rakeli nĩahotire kũgĩa na kaana. Agĩgatua Jusufu. Thutha-inĩ nĩtũrĩĩruta makĩria ũhoro wa Jusufu, tondũ nĩacokire gũtuĩka mũndũ wa bata mũno. Aya nĩo ariũ 11 arĩa Jakubu aciarire rĩrĩa atũũire kwa Labani ithe wa Rakeli.

O ũndũ ũmwe-rĩ, Jakubu nĩ aarĩ na airĩtu, ĩndĩ Biblia ĩtuonagia rĩĩtwa rĩa mũirĩtu o ũmwe tu. Eetagwo Dina.

Ihinda nĩrĩakinyire rĩrĩa Jakubu aatuire matigane na Labani acoke Kanaani. Nĩ ũndũ ũcio, agĩcokanĩrĩria famĩlĩ ĩo yake nene na rũũru rwake rũnene rwa ng’ondu na ng’ombe, na agĩkĩambĩrĩria rũgendo rũu rũraya.

Thutha wa Jakubu na famĩlĩ yake gũcoka Kanaani na gũikaranga kwa ihinda-rĩ, Rakeli agĩciara kahĩĩ kangĩ. Gwatuĩkire ũguo me rũgendo-inĩ. Rakeli nĩaagiĩkire mũno, na mũthia-inĩ agĩkua rĩrĩa aaciaraga. Ĩndĩ kahĩĩ kau gaaciarirũo ge kagima. Nake Jakubu agĩgatua Benjamini.

Tũkwenda kũririkana marĩĩtwa ma ariũ acio 12 a Jakubu tondũ rũrĩrĩ ruothe rwa Isiraeli ruoimire harĩ o. Ha ũhoro wa ma-rĩ, mĩhĩrĩga 12 ya Isiraeli ĩĩtĩtwo kuumana na ciana ikũmi cia Jakubu na igĩrĩ cia ariũ a Jusufu. Isaaka aatũũrire mĩaka mĩingĩ mũno thutha wa ihĩĩ icio gũciarũo, na no mũhaka nĩakenirio mũno nĩgũkorũo na tũcũkũrũ tũingĩ. Tareke tuone ũrĩa gwatuĩkire harĩ Dina mũcũkũrũwe.